काठमाडौं । राष्ट्रिय स्वतन्त्र पार्टी रास्वपाका सभापति रवि लामिछानेलाई काठमाडौं जिल्ला अदालतले हिरासत पठाएको छ ।
सहकारीको बचत अपचलनसम्बन्धी मुद्दामा बयानका निम्ति आफैँ काठमाडौं जिल्ला अदालतमा उपस्थित भएका लामिछानेको बयान सकिएपछि जिल्ला न्यायाधीश माधवप्रसाद अधिकारीले प्रहरीको जिम्मा लगाएका हुन् ।
बयान सकिएपछि इजसालसमा रविका कानूनव्यवसायी र न्यायाधीशबीच हिरासतमा पठाउने या परिवार या कानूनव्यवसायीको जिम्मा लगाउने विषयमा सवाल जवाफ चलेको थियो । लामिछानेले समेत आफू अदालत हाजिर भएकोले परिवारको जिम्मा लगाउन आग्रह गरेका थिए। तर न्यायाधीशले उनको कुरा सुनेनन् । त्यसलगत्तै लामिछानेले ‘श्रीमानको आदेश ससम्मान स्वीकार गर्छु’ भनेका थिए ।
बयान सकिए पनि थुनछेक बहस सुरु नभएपछि उनलाई अदालतले प्रहरीको जिम्मा लगाएको हो । सरकारी वकिलले बयान पढ्न समय मागेपछि थुनछेक बहस हुन नसकेको हो । अब प्रहरीले उनलाई भोलि सोमबार अदालतमा उपस्थित गराउनेछ ।
यसअघि लामिछाने ८४ दिनपछि पोखरा प्रहरीको हिरासतबाट रिहा भएका थिए ।
प्रतिक्रिया