नेपालगन्ज । बाँकेको नेपालगन्जलाई सदभावको शहरकारुपमा पनि चिन्ने गरिन्छ । कहिलेकाहीं नेपालगन्ज बाहिरका घुसपैठियाहरुले नेपालगन्जको सदभाव बिथोल्न खोजेपनि यहाँका स्थानीयहरुको भाइचारा भने अदभूत मेलमिलापपूर्ण रहेको छ ।
घर ब्यवहारमा मेलमिलाप मात्र होईन नेपालगन्जमा चाडपर्वमा देखिने मेलमिलाप पनि गहिरो र स्मरणीय छ । हिन्दु धर्म मान्ने स्थानीयबासी मोहर्रममा घरमा ताजिया सजाएर धार्मिक एकतामा सहभागी हुन्छन् भने मुस्लिम अगुवाहरु दसैंमा मान्यजन हिन्दु अगुवासँग टीका थापेर सदभाव प्रकट गर्दछन् ।
यसवर्षपनि नेपालगन्जका मुस्लिम अगुवा तथा बाँके युनेस्को क्लवका संरक्षक प्रवेजअलि सिद्दिकी हिन्दु सासुआमाको हातबाट टीका थाप्न पुगे । निधारभरी अक्षताको टीका र कानमा जमरा सिउरिँदा उनलाई गर्व महसुस भयो । ७३ वर्षिया सासुआमा मन्तुरिया थारुको हातबाट टीका र जमरा लगाउँदा उनलाई सासुआमाले लामो आयु र सुस्वास्थ्यको आशिर्वाद दिईन् । आफुभन्दा ठुलो मान्छेको आशिर्वाद लिन कुनै धर्मले बर्जित नगरेको सिद्दिकी बताउँछन् । उमेरले, नाताले र कर्मले ठुला मान्छेहरुसँग आशिर्वाद लिन र सम्मान प्रकट गर्दा धर्मको रक्षा हुने उनको तर्क छ । बिगत ३६ वर्षदेखि सिद्दिकीले हरेक वर्ष दसैंमा टीका लगाउँदै आएका छन् ।
नेपाल उद्योग बाणिज्य महासंघका केन्द्रीय सदस्य अब्दुल वाहिद मन्सुरीले पनि यसवर्ष दसैंको टीका लगाउने परम्परालाई दहोर्याए । अहिल्ला वर्षहरुमा जस्तै उनले आफ्नो मनको नाताले दिदी बनाएका आफन्त र मान्यवरबाट टीका र जमरा थापे । विगत लामो समयदेखि मन्सुरीले दसैं र तिहारमा हिन्दु आफन्तसँग टीका लगाउँदै आएका छन् ।
नेपालगन्जमा मुस्लिम समुदायका अगुवाले आफुले मानेको हिन्दु दिदीबहीनीको हातबाट भाइटीका पनि लगाउने गर्दछन् ।
धार्मिक सद्भावलाई कायम राख्न र दिदीभाइको सम्बन्ध सुमधुर बनाउन आफूले तिहारको भाइटीका लगाउने गरेको प्रवेजले बताए । उनले दिदी माया थापा र बहिनी मीना तुलाधरको हातबाट झण्डै दुई दशकदेखि भाइटीका लगाउँदै आएको बताए ।
प्रतिक्रिया