नेपालगन्जमा थपियो स्केट हाउस, आजबाट बागेश्वरी स्केट हाउस संचालनमा

नेपालगन्ज । नेपालगन्जमा थप एक स्केट हाउस सञ्चालनमा आएको छ । नेपालगन्जको बिपी चोकबाट पश्चिम कोरियनपुर सडकमा नयाँ स्केट हाउस संचालनमा आएको हो ।

स्थानीय जनक डांगीले नेपालगन्ज उपमहानगरपालिका वडा नम्वर १२ मा बागेश्वरी स्केट हाउस सञ्चालनमा ल्याएका हुन् । ५५ लाखको लागतमा आजबाट सञ्चालनमा आएको स्केट हाउस ६ हजार स्क्वायर फिटमा पूर्ण मापदण्ड अनुसार रहेको सञ्चालक डांगीले बताए ।

एक पटकमा ७० जनासम्म खेल्न मिल्ने गरि बनाइएको बागेश्वरी स्केटिङ नेपालगन्जमा सञ्चालनमा रहेका तीन वटा भन्दा ठूलो रहेको डाँगीले बताए ।

सञ्चालक डांगीले ८ देखि १८ वर्षका बालबालिका, किशोरकिशोरीलाई लक्षित गरेर स्केटिङ सञ्चालन गरेको बताए । उनले बालबालिकालाई मोबाइलको लतबाट छुटाउन स्केट खेलले भुमिका खेल्ने उनले अपेक्षा गरे ।

ट्राकसहित स्केटमा दुई जना प्रशिक्षक र ४ जना सहयोगी राखिएको छ । १० वर्षका लागि जग्गा लिजमा लिएर सञ्चालन गरिएको स्केटको मासिक खर्च एक लाख अनुमान गरिएको छ । एक घण्टा खेलेको दुई सय रुपैया तोकिएको छ । एक हप्ताको लागि उदघाटन अफरकारुपमा एक घण्टाको सय रुपैया कायम गरिएको उनले जानकारी दिए ।

नेपालगन्ज उपमहानगरमा ७ वटा स्केट हाउस दर्ता भएपनि हाल नेपालगन्जमा बागेश्वरी सहित २ वटा संचालनमा रहेका छन् ।