दुईपटक स्थगित समाजवादी मोर्चाको सुदुरपश्चिम भेला आइतबार

धनगढी । दुई पटक स्थगित भएको समाजवादी मोर्चाको सुदुरपश्चिम भेला आइतबार हुने भएको छ । आइतबार सुदुरपश्चिमको धनगढीमा हुने मोर्चाको भेलालाई सम्बोधन गर्न प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्ड धनगढी जाने भएका छन्। प्रचण्ड असोज २९ गते समाजवादी मोर्चाको भेला सम्बोधनका धनगढी जाने भएका हुन्।

प्रचण्ड आइतबार नेपालगन्जको एक कार्यक्रममा सहभागी भएर सोहि दिन धनगढी जाने कार्यक्रम रहेको प्रधानमन्त्रीको सचिवालयले जनाएको छ। यसअघि धनगढीमा हुने भनिएको मोर्चाको भेला दुई पटक स्थगित भएको थियो।

पहिलो पटक एमसीसी सम्झौता कार्यान्वयनको विषयलाई लिएर मोर्चा घटक दलहरूबीच विवाद हुँदा स्थगित भएको थियो भने अर्को एमालेका उपाध्यक्ष सुवास नेम्वाङको निधनका कारण भेला स्थगित भएको थियो।