बुटवल । बचतकर्ता, लगानीकर्ता र कर्मचारीको लाखौ रकम लिएर बेपत्ता भएका शाइन बहुद्देश्यीय सहकारी संस्थाका अध्यक्ष प्रकाश खनालको खोजी गर्न इलाका प्रहरी कार्यालय बुटवलले तदारकता नदेखाएको भन्दै बचतकर्ताहरु जिल्ला प्रहरी कार्यालय गुहार्न भैरहवा पुगेका छन् ।
बुटवलबाट सम्पर्क बिहिन भएका खनाल विदेश जाने हल्ला सुनेसँगै बचतकर्ताहरू उनालाई विदेशजानबाट रोक्न माग गर्दै जिल्ला प्रहरी कार्यालय गुहार्न पुगेका हुन् ।
बचतकर्ताहरुको उजुरीका आधारमा जिल्ला प्रहरी कार्यालयले सबै युनिटहरुमा खोजविनका लागि पत्राचार गरेको जिल्ला प्रहरी कार्यालय रुपन्देहीले जनाएको छ ।
बचतकर्ताले अध्यक्ष खनाल बुधबार विदेश जान लागेको जानकारी पाएपछि विदेश जानबाट रोक लगाउन भन्दै प्रहरीमा निवेदन परेको रुपन्देही प्रहरी प्रवक्ता डीएसपी श्यामु अर्यालले बताए । उनले सहकारीका अध्यक्ष खनालको खोजविनका लागि मातहतका युनिटहरुमा सूचित गरिएको पनि बताए ।
सहकारीबाट पीडित बचतकर्ता टेकराज पन्थीले अध्यक्ष खनाल विदेश जान सक्ने देखिएकाले प्रहरीमा सहयोग मागिएको बताए । सम्पर्क बाहिर रहेका खनालले काठमाडौंमा रहेको सूचना सार्वजनिक गरेपनि उनी अर्घाखाँचीको मैदानामा पछिल्लो पटक देखिएको स्रोतले दाबी गरेको छ । पछिल्लो सम्पर्कमा अध्यक्ष खनालले केही मिडियामा समाचार आएपछि आफू सम्पर्कविहीन हुनुपरेको जानकारी दिँदै छिट्टै सबैको हिसाव मिलाउने आश्वासन दिएको पीडितहरूले बताएका छन्।
खनालले बचतकर्ता, लगानीकर्ता सहित कर्मचारीको तलव र सहकारीमा राखेको निक्षप रकम समेत कुम्ल्याएर बेपत्ता भएको पीडितहरुको गुनासो छ ।
प्रतिक्रिया