काठमाडौं । आन्तरिक खिचलोका कारण उम्मेदवारको नाम तय गर्न नसकेको नेकपा एमालेले मनोनयन दर्ताको केही घण्टा अगाडि मात्र बारा क्षेत्र नम्बर २ मा हुने उपनिर्वाचनका लागि उम्मेदवारको नाम टुंगो लगाएको छ । एमालेले बारा २ को उप निर्वाचनका लागि पुरुषोत्तम पौडेललाई उम्मेदवार बनाउने निर्णय गरेको हो ।
आन्तरिक विवाद र उम्मेदवारमा धेरै आकांक्षी खडा भएपछि एमालेले उम्मेदवारको नामबारे निर्णय गर्न सकेको थिएन । पार्टी विभाजन अघि माधव नेपाललाई सघाएको भन्दै पौडेललाई उम्मेदवार बनाउन नहुने मत उठेपछि निर्णयमा ढिालाई भएको एमाले बाराका एक जिल्ला नेताले बताए ।
गत मंसिर ४ को निर्वाचनमा बारा २ को निर्वाचनमा एमालेले जनता समाजवादी पार्टीलाई सघाएको थियो । जसपाबाट चुनाव जितेका रामसहाय प्रसाद यादव उपराष्ट्रपति बनेपछि रिक्त भएको स्थानमा पूर्ति गर्न आगामी बैशाख १० गते उपनिर्वाचन हुने भएको हो ।
बारा २ सत्ता गठबन्धनको तर्फबाट जसपाका अध्यक्ष उपेन्द्र यादव, रास्वपाबाट रमेश खरेल, जनमत पार्टीबाट शिवचन्द्र कुसवाह र राप्रपाबाट सोनेलाल साह उम्मेदवार छन् ।
एमालेबाट पूर्व खेलकुद मन्त्रीसमेत रहेका पुरुषोत्तम पौडेल एमाले भित्रको विवाद उत्कर्षमा पुग्दा माधव नेपाललाई साथ दिए पनि एमाले विभाजन भएपछि भने एमालेमै बस्ने घोषणा गरेका थिए ।
प्रतिक्रिया