‘गर या मर’को मनस्थितिमा काम गर्नुपर्ने अवस्था रहेको छ : सीके राउत

काठमाडौं । जनमत पार्टीका अध्यक्ष डा. सिके राउतले आफुले ‘गर या मर’को मनस्थितिमा कामगर्नुपर्ने अवस्था रहेको बताएका छन् ।

शनिबार पार्टीद्वारा काठमाडौंमा आयोजित एक कार्यक्रममा बोल्दै राउतले जनताको अपेक्षा अनुसार आफूले ‘डू एण्ड डाई’को मनस्थितिमा काम गर्नुपर्ने अवस्था रहेको बताएका हुन् ।

सप्तरी क्षेत्र नम्बर २ बाट प्रतिनिधिसभा सदस्यमा निर्वाचित राउतले समानता, भाईचारा र मुलुकको समृद्धिका लागि काम गर्न आफ्नो पार्टी प्रतिवद्ध भएर लागिपर्ने बताए ।

उनले जनताले आफ्नो पार्टीलाई अन्तिम आशाको नजरले हेरेको दाबी समेत गरे । ‘जनताको आशालाई निराश हुन नदिने गरी रातदिन काममा खटिने योजना बनाएको छु’ उनले भने । ‘जनताको अपेक्षा पूरा गराउनका लागि आगामी दिनमा झन बढि सहयोगको अपेक्षा गरेको छु ।’

एउटा व्यक्ति सांसद, मन्त्री वा प्रधानमन्त्री हुँदैमा केही गर्न नसकिने तर सबैको सहयोग पाए जनताको हितमा काम गर्न सकिने उनको भनाई थियो ।

अध्यक्ष राउतले जनताले दिएको सल्लाह र सुझावकै आधारमा आफ्नो पार्टी अघि बढने प्रतिवद्धता जनाए । उनले निर्वाचनमा ठूलो आशा र भरोसाका साथ आफ्नो पार्टीलाई मतदान गरेको भन्दै मतदाताहरुलाई धन्यवाद समेत व्यक्त गरे ।