पोखरा । गण्डकी प्रदेशमा मुख्यमन्त्रीमा लागि दाबी पेश गरेका विपक्षी गठबन्धनका दलहरु प्रदेश प्रमुखको जवाफको प्रतिक्षा गरिरहेका छन् ।
संविधानको धारा १६८ को उपधारा ३ अनुसारको पृथ्वी सुब्बा गुरुङ सरकारले विश्वासको मत हासिल गर्न नसकेपछि उपधारा ५ अनुसारको सरकार गठनको प्रक्रिया सुरु भएको हो ।
यही उपधारा अनुसार विपक्षी दलहरुले वैकल्पिक सरकार गठनको दाबी पेश गरेका छन् । मुख्यमन्त्रीमा नेपाली कांग्रेस संसदीय दलका नेता कृष्णचन्द्र नेपाली पोखरेललाई प्रस्ताव गरेका दलहरु सपथका लागि प्रतिक्षा गरेका हुन् ।
२४ घण्टाको समय दिएर आज ३ बजेसम्म सरकार बनाउन समय दिएकी प्रदेशप्रमुख सीतादेवी पौडेलले अहिलेसम्म दलहरुलाई बोलाएकी छैनन् ।
दलहरुले शुक्रबार साँझ ३१ जना सांसद शशरीर उपस्थित भएर हस्ताक्षर सनाखत गराएका थिए । अर्को कुनै दाबी समेत परेको अवस्थामा पनि प्रदेश प्रमुखले सरकार गठनका लागि अहिलेसम्म नबोलाएकोमा विपक्षी दलहरुले शंका व्यक्त गरेका छन् ।
यसैबीच राजमोका निस्काशित सांसद कृष्ण थापा प्रदेश प्रमुखको निवासमा पुगेर फर्किएका छन् । शुक्रबारै बहुमत पुर्याएपनि अहिलेसम्म नबोलाउनु तर निस्काशित सांसदलाई प्रदेश प्रमुखले भेट गरेपछि दलहरुले आशंका व्यक्त गरेका हुन् । थापाले राजमोको संसदीय दलको नेता परिवर्तन नभएको पत्र बुझाएका छन् ।
प्रतिक्रिया