बुटवल। हरेक दिन सयौं कोरोना संक्रमितको सेवामा खटिने स्वास्थ्कर्मीहरु स्वयं संक्रमित हुन थालेपछि लुम्बिनी प्रादेशिक अस्पतालको सेवामा सामान्य असर देखिन थालेको छ । संक्रमितको उपचार गर्दा गर्दै आफै संक्रमित बनेपछि कतिपय स्वास्थ्यकर्मी घरमा नगएर अस्पतालकै क्वाटरलाई आइसोलेसन बनाएर बसेका छन् भने कतिपय अस्पतालमै भर्ना भएर उपचार गराईरहेका छन् ।
लुम्बिनी प्रादेशिक अस्पतालमा मात्र ६४ जना स्वास्थ्यकर्मी कोरोना संक्रमित बनेका छन् । अस्पतालमा कार्यरत मेडिकल अफिसर देखि ठूलो संख्यामा नर्सिङ स्टाफहरु संक्रमित भएपछि अस्पतालको सेवामा सामान्य असर देखिएको अस्पतालले जनाएको छ । रातदिन संक्रमितकै उपचारका खटिने क्रममा उनीहरुलाई संक्रमितहरुबाटै संक्रमण सरेको हो । अस्पतालमा काम गर्ने क्रममा संक्रमण पुष्टि भएपछि घर परिवारमा सर्न नपावस् भन्दै घर जान नचाहेका स्वस्थ्यकर्मीलाई समस्या देखिएको अस्पतालले जनाएको छ । कोरोनाको पहिलो लहरमा स्वास्थ्य मन्त्रालयको आश्वासनमा होटलमा आइसोलेशन बनाएर बसेका संक्रमित स्वास्थ्कर्मीहरुको शोधभर्ना मन्त्रालयले नगरिदिएपछि यसपटक स्वास्थ्यकर्मीहरुले पेयवल आइसोलेशन बनाउन नसकेको अस्पताल प्रशासनले बताएको छ ।
लुम्बिनी प्रादेशिक अस्पतालमा कार्यरत ६४ बढी स्वास्थ्कर्मीलाई अहिलेसम्ममा कोरोना संक्रमिण पुष्टि भईसकेको छ । अस्पतालका सुचना अधिकारी डा.बिष्णु गौतमले दिएको जानकारी अनुसार ५ जना मेडिकल अफिसर, ८ जना पारामेडिक, २३ जना नर्सिङ स्टाफ, १५ जना सपोर्टिङ स्टाफ, एनेस्टेसिया २ जना, गाईनोक्लोजिष्ट २ जना, प्रशासन तर्फबाट १ जना र फर्मासिस्ट तर्फका ८ जनालाई कोरोना संक्रमण पुष्टि भएको छ । लक्षण सहितका १७ जनाको अस्पतालमै उपचार चलिरहेको छ भने लक्षण नदेखिएका संक्रमितहरु निवासमै आइसोलेट भएका छन् ।
अस्पतालले कोरोनासंग सरोकार नरहेका बाहेक सबै कन्सल्टेण्ट, मेडिकल अफिसर र कोरोना करारका चिकित्सकहरुलाई कोरोना संक्रमणको उपचारमा परिचालन गरेको प्रवक्ता डा. गौतमले जानकारी दिए । एकै पटक ६४ बढी स्वास्थ्यकर्मीहरु संक्रमित हुन पुग्दा सेवामामा सामान्य असर पुग्नु स्वाभाविक भएको उनले बताए ।
अस्पतालमा कुल ६०० कर्मचारी कार्यरत छन् । डा. गौतमका अनुसार अस्पतालमा मेडिकल अफिसर लेबलका १८ जना, विकास समितिबाट १५ जना, कोरोना करारमा नियुक्त भएका ८ जना तथा कन्सल्टेण्ट चिकित्सकहरु करिव ३५ जना कार्यरत छन् । कोरोना संक्रमणको उपचारका लागि मात्र १०० बढी स्टाफ नर्सहरु करारमा भर्ना गरिएको छ ।
जनशक्तिमा कमी नहोस् भनेर वार्डहरु मर्ज गरेर कोरोना संक्रमतिको उपचारको ब्यवस्था मिलाईएका कारण अहिले सम्म समस्या नदेखिएको डा. गौतमले बताए ।
जनशक्तिको अभाव हुन नदिन अन्य वार्डहरुबाट दक्ष जनशक्ति सिफ्ट गरेर भएपनि उपचारमा कमी आउन नदिने गरि तयारी भईरहेको लुम्बिनी प्रादेशिक अस्पतालका कोरोना फोकलपर्शन डा. नन्दु पाठकले बताए । ‘आवश्यकता अनुसार मिलाउन सकिएसम्म अन्य वार्डबाट सिफ्ट गरेर पनि ब्यवस्था मिलाउँदै छौं ।’ उनले भने ।
लुम्बिनी प्रादेशिक अस्पतालले संचालन गरेको कोरोना विशेष अस्पताल सहित इमर्जेन्सी र फिभर क्लिनीकमा गरि ३५८ जना कोरोना संक्रमितको प्रादेशिक अस्पतालमा उपचार चलिरहेको छ ।
प्रतिक्रिया