काठमाडौँ । महानगरीय ट्राफिक प्रहरी महाशाखाले यात्रुसँग बढि भाडा लिने तिन जनालाई गंगबु बसपार्क आसपासबाट पक्राउ गरेको छ ।
कोरोना भाइरस संक्रमण रोकथाम तथा नियन्त्रणको लागी जारी भएको निषेधाज्ञामा मौकाको फाइदा लिन खोज्ने पोखरा माईक्रो र बुटवल भैरहवा काउण्टरको कर्मचारीलाई आज बसपार्कबाट नियन्त्रणमा लिएको हो ।
काठमाण्डौं देखि पोखरासम्मको नियमित साधारण बसभाडा ५०० र बुटवलसम्म एसी बसको बस भाडा १२०० तोकिएकोमा पाँच सय प्रतिशतसम्म बढि भाडा लिएको कसुरमा तिनजनालाई पक्राउ गरिएको महाशाखा प्रमुख एसएसपी जनक भट्टराईले जानकारी दिए । उनले पोखरा जाने यात्रुसँग ३५०० र बुटवल जाने यात्रुबाट जनही ६००० का दरले भाडा लिन क्रममा ३ जनालाई पक्राउ गरिएको बताए ।
उपत्यका छाडी आफ्नो घर फर्किन खोज्ने यात्रुहरुलाई ग १ ख ९६२१ मार्फत पोखरा र बा ४ ख ५१९७ नम्बरको बस मार्फत बुटवल जाने यात्रुहरुबाट बढि भाडा असुलेको हो ।
पक्राउ पर्नेमा पोखरा माईक्रोमा काम गर्ने पोखरा(३३ घर भइ काठमाण्डौं बस्दै आएका बन्दराज पराजुली र रतुवामाई ९-मोरङ्ग घर भई नेपालटार बस्ने नबीन पौडेल साथै बुटवल भैरहवा काउण्टरमा काम गर्ने धादिङ् थाक्रे-७ का रंजित सिलवाल रहेको महाशाखाले जनाएको छ ।
ट्राफिक प्रहरी महाशाखाले यस्तो बिषम परिस्थितिमा हुन सक्ने यात्रु ठगी तथा आइपर्न सक्ने यातायात सम्बन्धि समस्या अनुगमनको लागी सादा पोशाकमा बिशेष टोली परिचालन गरेको जनाएको छ । टोलीले आफै यात्रु बनेर भाडा मोलमोलाई गर्ने र बढि भाडा लिन खोज्नेलाई निग्रानीमा राखि नियन्त्रण गर्ने गरेको छ ।
यस अघि यात्रुसँग बढि भाडा लिने बाग्लुङ्ग भगवती काउण्टरका कर्मचारी मिलन सारुलाई महाशाखाले पक्राउ गरेको थियो । पक्राउ परेका तिनै जनालाई आबश्यक कारबाहीको लागी महानगरीय प्रहरी प्रभाग, बसपार्कमा बुझाएको छ ।
प्रतिक्रिया