काठमाडौं । १४ औँ संस्करणको इन्डियन प्रिमियर लिग (आइपिएल) २०२१ क्रिकेट प्रतियोगितामा रोयल च्यालेञ्जर्स बैंगलोरले लगातार दोस्रो जित हासिल गरेको छ ।
बुधबार राति भएको प्रतियोगिताको छैठौँ खेलमा बैंगलोरले सन राइजर्स हैदरावादलाई ६ रनले पराजित गर्दै तालिकाको शीर्ष स्थानमा उक्लिएको हो ।
मुथैया अन्नामलाई चिदम्बरम स्टेडियम चेन्नइमा टस हारेर पहिले ब्याटिङको निम्तो पाएको बैंगलोरले निर्धारित २० ओभरमा ८ विकेट गुमाएर १ सय ४९ रन बनाएको थियो ।
सामान्य सुरुवात गरेको बैंगलोरका लागि ग्लेन म्याक्सवेलले अर्धशतकीय योगदान गरे । ४१ बलको सामना गरेका म्याक्सवेलले ३ छक्का र ५ चौकाको मद्धतमा ५९ रन बनाए । यस्तै, कप्तान विराट कोहलीले ३३, साहवाज अहमदले १४, काइल जेमिसनले १२ तथा देवदत्त पडिक्कलले ११ रन जोडे ।
हैदरावादका ज्यासन होल्डरले ३, राशिद खानले २ तथा भुवनेश्वर कुमार, टी नटराजन र साहवाज नदीमले समान एक-एक विकेट लिए । १ सय ५० रनको मध्ययम लक्ष्य पाएको हैदरावादले ९ विकेटको क्षतिमा १ सय ४३ रन मात्र बनाउन सक्यो ।
खराब सुरुवात गरेपनि दोस्रो विकेटका लागि डेविड वार्नर र मनिष पाण्डेले ८३ रनको साझेदारी गर्दै जित नजिक पुर्याए । वार्नर ५४ तथा पाण्डे ३८ रनमा आउट भए । यस्तै, राशिद खानले १७ तथा जोनी बेइस्ट्रोले १२ रन बनाएपनि टोलीलाई दोस्रो हारबाट बचाउन सकेनन् ।
हैदरावादलाई सस्तैमा रोक्ने क्रममा बैंगलोरका शाहबाज अहमदले ३, हर्सल पटेल र मोहम्मद सिराजले समान २-२ तथा काइल जेमिसनले एक विकेट लिए ।
हैदरावादमाथिको जितसँगै बैंगलोर अंक तालिकाको शीर्ष स्थानमा उक्लिएको छ । बैंगलोरको दुई खेलबाट ४ अंक छ । दिल्ली, मुम्बइ, पञ्जाव र कोलकाताको समान २-२ अंक छ भने राजस्थान, हैदरावाद र चैन्नइले खाता खोल्न सकेको छैन ।
प्रतिक्रिया