खोटाङ । खोटाङ खोटेहाङ गाँउपालिकाकी जेष्ठ नागरिक महिलाको आगोमा जलेर मृत्यु भएको छ ।
आगो ताप्नेक्रममा शरीर जलेर गम्भीर घाइते भएकी खोटेहाङ गाउँपालिका–७ खोटाङ बजारकी १०१ वर्षीया हिमादेवी अधिकारीको शुक्रबार मृत्यु भएको हो ।
आफ्नै घर पालेको गाईवस्तुलाई कुँडो पकाउन बालेको आगो ताप्ने क्रममा शुक्रबार बिहान लुगामा आगो सल्किएर उनी गम्भीर घाइते भएकी थिईन् । आगोले जलेर गम्भीर घाइते भएकी हिमादेवीको घरैमा स्वास्थ्यकर्मी झिकाएर उपचार गराउने क्रममा मृत्यु भएको स्थानीयले बताएका छन् ।
मृतक हिमादेवी सो गाउँपालिकाभरिकै सबैभन्दा ज्येष्ठ नागरिक भएको बताईएको छ । कपडा जलेको गन्धका आधारमा आफन्तले थाहा पाएपछि उनलाई जलिरहेको अवस्थामा उद्धार गरेका थिए ।
हिमादेवीको मृत्यु भईसकेपछि स्थानी जनप्रतिनिधिले प्रहरीलाई खबर गरेको खाटाङ प्रहरी प्रमुख नायव प्रहरी उपरिक्षक नारायण प्रसार चिमोरीयाले बताए । प्रारम्भिक अनुसन्धानमा कुंडो पकाउन बालिएको आगोले कपडामा सल्कँदा मृतक गम्भीर घाइते भएको र उपचारका क्रममा मृत्यु भएको डीएसपी चिमोरीयाले बताए । हिमादेवीको शव परीक्षणका लागि प्राथमिक स्वास्थ्य केन्द्र चिसापानी पठाइएको छ ।
प्रतिक्रिया