लामो समयपछि संक्रमितको संख्या ३ अंकमा सीमित; ५७० संक्रमित थपिए, डिस्चार्ज हुने ३१६८ जना

काठमाडौं । जति बढी परीक्षण त्यति बढी संक्रमण, जति कम परीक्षण त्यति कम परीक्षण । दशैंको भोलिपल्ट आज लामो समयपछि कोरोना भाइरसका सबैभन्दा कम संक्रमित थपिएका छन् ।

आज मंगलबार ५७० जनामा मात्रै संक्रमण पुष्टि भएको स्वास्थ्य तथा जनसंख्या मन्त्रालयको अपडेटमा जनाइएको छ । तर, आज जम्मा २ हजार २५ मात्रै पीसीआर परीक्षण भएको थियो । मन्त्रालयका अनुसार ३ हजार १६८ जना संक्रमित संक्रमणबाट मुक्त भएका छन् ।

मन्त्रालयका अनुसार हालसम्म कुल संक्रमितको संख्या १ लाख ६० हजार ४०० पुगेको छ भने १ लाख १८ हजार ८४३ जना संक्रमण मुक्त भएका छन् ।

मंगलबार देशभर सक्रिय संक्रमितको संख्या ४० हजार ६१८ मा झरेको छ । संक्रमित भन्दा निको हुनेको संंख्या ठूलो भएका कारण सक्रिय संक्रमितहरु घटेका छन् ।

पछिल्लो २४ घण्टामा १४ जनाको मृत्यु भएको छ । हालसम्म मृतकको संख्या ८७६ पुगेको छ ।