काठमाडौं । भारतीय सेनाका सेनाध्यक्ष मनोजमुकुन्द नरवाणे आगामी कार्तिक महिनामा नेपाल भ्रमण गर्ने भएका छन् ।
नरवाणेलाई भ्रमणका क्रममा नेपाली सेनाले मानार्थ प्रधानसेनापतिको उपाधी प्रदान गर्ने भएको छ ।
भारतले सीमा अतिक्रमण गरेको विरोधमा नेपालमा प्रदर्शन हुँदा अर्को कुनै देशबाट नेपालीहरु परिचालित भएको विवादास्पद टिप्पणी गरेका थिए ।
नेपाली सेनाले बुधबार विज्ञप्ति जारी गर्दै नरवाणेको नेपाल भ्रमण निश्चित भएको जनाउँदै उपाधी प्रदान गर्न लागिएको जनाएको छ ।
नेपाल र भारतका प्रधानसेनापतिलाई एक अर्को देशमा मानार्थ प्रधानसेनापतिको उपाधी प्रदान गर्ने प्रचलन रहिआएको छ ।
नयाँ प्रधानसेनापति भएलगत्तै दुवै मुलुकका सेनापतिले एक अर्को देशको पहिलो भ्रमण गरी मानार्थ उपाधी ग्रहण गर्नेगर्छन् ।
तर, नरवाणे भारतीय सेनाको सेनाध्यक्ष भएको लामो समयपछि मात्रै नेपाल आउन लागेका हुन् । नरवाणेको भ्रमणलाई भने नेपालको मन्त्रिपरिषद्ले २०७६ माघ २० गते नै स्वीकृति दिएको थियो ।
भारतले सीमा अतिक्रमण गरेपछि नेपालमा तिब्र विरोध भएपछि र नेपाल सरकारले अतिक्रमित नेपाली भूमिलाई समेटेर नयाँ नक्शा जारी गरेपछि नरवाणेले नेपाल विरुद्ध टिप्पणी गरेका थिए ।
यद्यपी, कोरोना महामारीका कारण नरवाणेको नेपाल भ्रमण रोकिएको दुवै मुलुकका अधिकारीहरुले बताउने गरेका छन् ।
चीनसँग सीमा विवाद हुँदा दर्जनौं पटक प्रत्यक्ष वार्ता गरेको भारतले नेपालसँग भने वार्ता नै नगरी अल्झाउने रणनीति लिइराखेको छ ।
नरवाणेको नेपाल भ्रमणलाई अब दुई मुलुकबीचको सम्बन्ध सुधारको संकेतका रुपमा समेत बुझ्न सकिन्छ ।
यसबीचमा भारतसँग सम्बन्ध पुनः सामान्य बनाउन नेपालले निकै मेहनत समेत गरेको छ ।
प्रतिक्रिया