काठमाडौं । शनिबार विहान थप ३२ जना कोरोना संक्रमित थपिएका छन् ।
सर्लाही, बारा, चितवन, काठमाडौं, रुपन्देही, कपिलवस्तुमा कोरोना संक्रमित भेटिएको स्वास्थ्य तथा जनसंख्या मन्त्रालयले जनाएको छ ।
राष्ट्रिय जनस्वास्थ्य प्रयोगशाला काठमाडौंमा गरिएका परीक्षणमा सर्लाहीको गोडैतता कविलासी नगरपालिकामा सबैभन्दा धेरै १३ जना, कपिलवस्तुको वाणगंगा नगरपालिकामा ८ जना र बाराको करैयामाई गाउँपालिकाका एक जना र काठमाडौंका एक जनामा कोरोना संक्रमण देखिएको छ ।
यस्तै, प्रदेशिक जनस्वास्थ्य प्रयोगशाला भैरहवामा गरिएको परीक्षणमा रुपन्देहीको गैडहवा र रोहिणी गाउँपालिकाका आठ जनामा संक्रमण पुष्टि भएको छ ।
यस्तै भरतपुर अस्पताको कोभिड १९ प्रयोगशालामा गरिएको परीक्षणमा भरतपुर महानगरपालिका वडा नं. ६ का एक जनामा संक्रमण पुष्टि भएको मन्त्रालयले जनाएको छ ।
भरतपुर ६ मा शुक्रबार मात्र दुई जना बृद्ध दम्पतीलाई कोरोना संक्रमण पुष्टि भएको थियो ।
यससँगै कोरोना संक्रमितको संख्या ५ सय ४८ पुगेको छ ।
प्रतिक्रिया