अस्पतालबाटै संक्रमित भागेपछि वीरगंजमा खैलाबैला

वीरगंज । कोरोना संक्रमण पुष्टी भएपछि उपचारका लागिवीरगन्जस्थित नारायणी अस्पतालमा भर्ना भएका दुई जना अस्पतालबाटै फरार भएका छन् ।

अस्पतालको आइसोलेसनमा उपचार गराइरहेका दुई जना बुधबार मध्यान्ह फरार भएका हुन् । अस्पतालको आइसोलेसन कक्षबाट राजनाथ यादव र असफर हवारी भन्ने दुईजना फरार भएको अस्पताल स्रोतले जनाएको छ ।

पर्सामा हालसम्म ८२ जनामा कोरोना संक्रमण पुष्टि भएको छ भने त्यसमध्ये तीन जना डिस्चार्ज भइरहेका छन् । फरार भएकाहरुको खोजीकार्य भइरहेको प्रहरीले जनाएको छ । फरार भएकाहरु पर्साकै भएको बताइएको छ । पर्सा प्रहरी प्रमुख प्रहरी उपरिक्षक गंगा पन्थले कोरोना संक्रमित भागेको खबर पाउनासाथ खोजीका लागि प्रहरी खटिएको जानकारी दिनुभएको छ । उहांले कोरोना संक्रमित भागेको खबर आएलगत्तै खोजीका लागि प्रहरी टोली परिचालन गरिएको बनाउनुभयो। संक्रमित भागेपछि अस्पतालमा खैलाबैला मच्चिएको थियो ।

पर्सामा संक्रमित तीव्र गतिमा थपिएपछि मंगलबारदेखि आगामी जेठ ५ गतेसम्मका लागि निषेधाज्ञा जारी गरिएको छ।