तोपेखोलामा पहिरो खस्यो, नारायणगढ मुग्लिन सडक आज पुनः अवरुद्ध

चितवन । बुधबार १४ घण्टा लगाएर खोलाइएको नारायणगढ मुग्लिन सडक आज पुनः अवरुद्ध भएको छ । चितवनको नारायणगढ–मुग्लिन सडकखण्डको तोपे खोलामा सुख्खा पहिरो खस्दा नारायणगढ–मुग्लिन सडकखण्ड अवरुद्ध भएको हो ।

आज बिहान पौने ९ बजेको समयमा इच्छाकामना गाउँपालिका–६ तोपेखोला नजिकै सुख्खा पहिरो खस्दा सडक दुईतर्फी अवरुद्ध भएको बागमती ट्राफिक प्रहरी कार्यालयले जनाएको छ ।

हिजो राभरिको प्रयासमा पहिरो पन्छाएर सवारी साधनलाई पालैपालो गन्तव्यमा पुर्याइरहेको बेला फेरि खसेको पहिरोका कारण सडक अवरुद्ध हुँदा यात्रुहरुले सास्ती पाएका छन् ।

पहिरोले अवरुद्ध भएको सडकमा सवारी चालकहरुले जथाभावी सवारी साधन अगाडि बढाउन खोज्दा थप जाम हुन पुगेको बागमती ट्राफिक प्रहरी कार्यालयका प्रमुख एसपी सुशिलस्.िक राठौरले बताए । पहिरो हटाउने क्रम जारी छ । सुख्खा पहिरो खस्ने क्रम नरोकिएकाले सडक खुल्न असहज भएको प्रहरीले जनाएको छ ।