एमाले-माओवादी गठबन्धनलाई ढलाएर सिद्धार्थनगर ७ भैरहवामा वडा अध्यक्ष जितेका भिमसेनले त्यागे नेपाली कांग्रेस

भैरहवा । जिवनभर कांग्रेस बाहेक अन्यत्र कल्पना नगरेका भैरहवाका कांग्रेसका बुराना नेता भिमसेन कर्माचार्यले पार्टी परित्याग गरेका छन् । २०७४ सालमा तत्कालिन एमाले माओवादी गठबन्धनलाई पराजित गरेर नेपाली कांग्रेसबाट निर्वाचित सिद्धार्थनगर नगरपालिका वडा नम्बर ७ का वडा अध्यक्ष समेत रहेका कर्मचार्य सहित कांग्रेस वडा नम्बर ७ सभापति भविलाल पौडेल र वडा सचिव अमृत कर्माचार्यले पार्टी परित्याग गरेका हुन् ।

मंगलबार कांग्रेस सिद्धार्थनगर सभापति कोशिष बहादुर खड्कालाई राजीनामा दिदै पार्टीकोसाधारण सदस्य समेत नरहने गरी पार्टी परित्याग गरेको वडा सभापति पौडेलले जानकारी दिए ।

दशकौं देखि अनवरत रुपमा पार्टीलाई उर्जा प्रदान गर्दै योगदान गरेपनि आसन्न निर्वाचनमा पार्टीले मुल्यांकन नगरेका कारण परित्याग गर्नु परेको उनीहरुले बताएका छन् । पार्टी सिद्धान्तमा नभई व्यक्तिवादी हाबी भएकोले र कुनै सल्लाह सुझाव नलिई एकलौटी निर्णय मनपरी पार्टी चलाएको भन्दै साधारण सदस्य समेत नरहने गरी परित्याग गरिएको उनीहरुले पार्टीलाई बुझाएको राजीनामा पत्रमा उल्लेख छ ।