अर्घाखाँचीमा पहिरोमा पुरिएर एक जनाको मृत्यु

अर्घाखाँची । पहिरोमा पुरिएर अर्घाखाँचीको पाणिनी गाउँपालिका-५ मैदानमा एक जनाको मृत्यु भएको छ ।

पाणिनी-६ धातिवाङ्गका ४५ वर्षीय मानबहादुर सुनारको पहिरोमा पुरिएर मृत्यु भएको जिल्ला प्रहरी कार्यालय अर्घाखाँचीका प्रमुख प्रहरी नायब उपरीक्षक अमरबहादुर थापा क्षेत्रीले जानकारी दिए ।

स्थानीय मेघराज घिमिरेको घरमा प्लास्टर गर्ने क्रममा माथिबाट आएको पहिरोमा उनी पुरिएका थिए । स्थानीय बासिन्दाका अनुसार पहिरो खस्दा उनी एक्लै काम गरिरहेका थिए ।

स्थानीय बासिन्दा र प्रहरीले पहिरो पन्छाएपछि शुक्रबार राति ९ः१५ बजे मृत अवस्थामा फेला पारेको प्रहरीले जनाएको छ ।

उनको शव पोस्टमार्टमका लागि जिल्ला अस्पताल ल्याइएको छ ।