६१ सालमा लुकाएको बम ७७ सालमा डिस्पोज !

हुम्ला । हुम्लाको सिमकोट गाउँपालिका– २ स्थित ठेहेगाउँमा फेला परेको २ थान बम नेपाली सेनाले निश्क्रिय पारेको छ । ठेहेगाँस्थित दुई घरको बीचमा भेटिएको १ थान सुतली बम र १ थान सकेट बम नेपाली सेनाको टोलीले निष्क्रिय पारेको हो ।

ठेहेका स्थानीय तुला रावल र लोग भण्डारीको घरको बीच भागमा बम फेला परेको थियो । घरबाट बाहिर निस्कने क्रममा घर छेउमै प्लास्टिकमा बेरेर राखेको अवस्थामा बम जस्तु वस्तु देखेपनि तुला भण्डारीले प्रहरीलाई खबर गरेको थिए । बमका बारेमा प्रहरीले गरेको सूचनाका आधारमा आइतबार सिमकोटबाट खटिएको नेपाली सेनाको बम डिस्पोजल टोलिले बम भेटिएको स्थानबाट करिब ५०० मिटर टाढाको खोलामा लगेर डिस्पोज गरेको थियो ।

फेला परेको बम राखिएको प्लास्टिकमा बमसँगै २०६१ सालमा प्रकाशित जनादेश पत्रिका पनि भेटिएकाले उक्त बम तत्कालीन माओवादीले ६१ साल तिरै लुकाएको हुन सक्ने अनुमान गरिएको छ । बमसँगै २०६१ चैत्र २ गतेको जनादेश पत्रिका भेटिएको थियो ।