बुटवल । बुटवलमा उपमहानगरपालिकामा सञ्चालन हुन गईरहेको दोश्रो नगरस्तरीय राष्ट्रपति रनिङ शिल्ड छनौट प्रतियोगिताको तयारी पुरा भएको छ । बुटवल नगर खेलकुद विकास समितिको आयोजनामा आज बुटवलमा पत्रकार सम्मेलन गर्दै प्रतियोगिताको तयारी पुरा भएको जानकारी दिईयो ।
पत्रकार सम्मेलनमा बोल्दै नगर खेलकुद विकास समितिका अध्यक्ष नन्दु काउछाले प्रतियोगिताको तयारी पुरा भएको र धेरैभन्दा धेरै विद्यालय र विद्यार्थीको सहभागिता रहने जानकारी दिए । उनले नगर खेलकुद विकास समितिको गठनपछि बुटवलभित्र रहेका सामुदायिक विद्यालयका शिक्षकहरुलाई राष्ट्रपति रनिङ शिल्डमा हुने विभिन्न खेलकुदबारे प्रशिक्षण दिईएको भन्दै त्यसैको परिणाम स्वरुप यसवर्ष सहभागि विद्यालय र विद्यार्थी संख्या बढेको बताए ।
फागुन ७ गतेदेखि १० गतेसम्म चल्ने राष्ट्रपति रनिङ शिल्ड छनौट प्रतियोगिता बुटवल ११ देविनगरस्थीत एन्फा एकेडेमीको खेल मैदानमा हुने पत्रकार सम्मेलनमा जानकारी दिईयो । प्रतियोगिता अन्तर्गत नगरका संस्थागत र सामुदायिक गरि ३० विद्यालयको सहभागिता रहने काउछाले जानकारी दिए ।
कुल १ हजार ३ सय ३४ विद्यार्थी सहभागि रहने प्रतियोगितामा ४२ स्वर्ण, ४२ रजत र ४२ कास्य पदकका लागि प्रतिष्प्रधा हुनेछन् ।
विद्यालयस्तरमा रहेका प्रतिभालाई छनौट गरी उत्कृष्ट खेलाडीहरुलाई जिल्ला स्तरीय हुंदै प्रदेश र राष्ट्रिय प्रतियोगितामा समावेश गराउने उद्देश्यले रनिङ शिल्ड आयोजना गरिएको नगर खेलकुद विकास समितिका सदस्य सचिव एवं कालिका मानविज्ञान माविका प्रधानाध्यापक विष्णुहरी ज्ञवालीले जानकारी दिए ।
प्रतियोगितामा एथ्लेटिक्स, रिले दौड, हाइजम्प, लङजम्प, त्रिपलजम्प, ज्याभलिन थ्रो, सटपुट, भलिबल,कबड्डी, करांते, तेक्वाण्डो लगायतका प्रतियोगिताहरु हुनेछन् । आयोजकका अनुसार करांते र तेक्वाण्डो भने रनिङ शिल्डमा गणना गरिने छैन ।
प्रतिक्रिया