काठमाडौं । नेपाल कम्युनिष्ट पार्टी नेकपाको प्रचण्ड नेपाल पक्षका अध्यक्ष माधवकुमार नेपालले केपी ओली हिटलरी नाजीवादमा हिँडेको आरोप लगाएका छन् ।
काठमाडौं आयोजित विरोध प्रदर्शनपछिको आमसभालाई सम्बोधन गर्दै अध्यक्ष नेपालले ओलीमा कम्युनिष्ट चरित्र समाप्त भएर हिटलरी नाजवादी चरित्र हावी भएको बताए । नेपालले भने, ‘ओलीले पार्टी सिध्याउने मात्र काम गरे । जनताका समस्या वेवास्ता गरे । कम्युनिष्ट चरित्र गुमाए । अहिले हिटलरी नाजीवादको बाटोमा अघि बढेका छन् । ’
अध्यक्ष नेपालले ओलीले प्रतिनिधिसभा विघटन गरेर संवैधानिक कु गरेको आरोप लगाउँदै उनको कु लाई असफल पारिने दाबी गरे ।
नेपालले केपी ओलीले अझै पनि गल्ती गरेको खण्डमा केही समय जेलमा राखेर भएपनि माफी दिन सक्ने बताए । ओलीले पार्टीले सोधेको स्पष्टीकरण नबुझाए उनलाई साधारण सदस्यबाट निस्काशित गर्ने चेतावनी दिए ।
उनले भने, ‘हामीले केपी ओलीलाई अध्यक्षबाट निष्कासन गर्यौं । अब अनुशासनको कारवाहीका लागि स्पष्टीकरण सोधेका छौं । उहाँले जवाफ दिनुभएको छैन । म भर्खरै कर्णालीबाट आउँदैछु । कतै जवाफ आइहाल्यो कि भन्ने पनि लाग्यो । प्रचण्ड, झलनाथ, नारायणकाजीहरुसँग कुराकानी गर्न पाएको छैन । स्पष्टीकरण नबुझाए साधारणसदस्यबाट निस्काशित गछौं ।’
नेपालले अब नेकपा फेरि ओलीसँग नझुक्ने पनि स्पष्ट गरे ।
सभालाई सम्बोधन गर्दै वरिष्ठ नेता झलनाथ खनालले प्रधानमन्त्री ओलीले घुँडा नटेकेसम्म संघर्ष जारी रहने बताए । खनालले ओलीले प्रतिक्रान्तिको थालनी गरेको भन्दै खनालले उनको कदमलाई सफल हुन नदिइने पनि बताए । खनालले समेत ओलीमा कम्युनिष्ट चरित्र नरहेकै कारण पार्टीबाट निस्काशन गरिएको बताए ।
ओलीले प्रतिक्रान्तिको थालनी गरेको आरोप लगाउँदै खनालले उनको कदमलाई सफल हुन नदिइने दाबी गरे। उनले भने, ‘प्रतिनिधिसभा विघटन गरेर केपी ओलीले प्रतिक्रान्तिको थालनी गरेका छन् । देशलाई अस्थिरतामा लैजाने थालनी भएको छ । देशलाई अस्थिरतामा जानबाट बचाउनु पर्छ ।’
प्रतिक्रिया