रुपन्देहीमा थपिए ७६ नयाँ कोरोना संक्रमित, कुल संक्रमित संख्या २ हजार नजिक

बुटवल । रुपन्देहीमा शुक्रबार कोरोना संक्रमणको रफ्तारले गति लिएको छ । पछिल्लो २४ घण्टामा जिल्लामा ७६ जना नयाँ कोरोना संक्रमित थपिएका छन् ।

स्वास्थ्य कार्यालय रुपन्देहीका अनुसार रुपन्देहीको बुटवल उपमहानगरले सबै स्थानीय तहलाई उछिन्दै ४५ जना नयाँ कोरोना संक्रमित थपेको छ भने रोहिणी गाँउपालिकामा १४ जना नयाँ संक्रमित थपिएका छन् ।

त्यसैगरी तिलोत्तमा नगरपालिकामा ९ जना, सिद्धार्थनगर नगरपालिकामा ३ जना तथा देवदह नगरपालिका, कञ्चन गाउपालिका, सियारी गाँउपालिका, सैनामैना नगरपालिका र ओमसतिया गाँउपालिकामा १।१ जना संक्रमित थपिएका छन् ।

रुपन्देहीमा शुक्रबार ७६ कोरोना संक्रमित थपिएसँगै कुल संक्रमितको संख्या १९४२ पुगेको छ । जिल्लामा २० जनाको संक्रमणबाट मृत्यु भईसकेको छ । हाल ७६५ जना संक्रमितहरुले बिभिन्न आइसोलेसनमा बसेर उपचार गराईरहेका छन् ।