रुपन्देहीमा आयो स्वास्थ्य कार्यालय र स्थानीय तहको फरक तथ्यांक, स्वास्थ्यले १६ थपिएको सुचना दिंदा बुटवलमा मात्र २० जना संक्रमित थपिए

बुटवल । पछिल्लो २४ घण्टामा बुटवलमा २० जना नयाँ कोरोना संक्रमित थपिएका छन् । बुटवल उपमहानगरपालिकाले दिएको जानकारी अनुसार बुटवलमा वार्ड नम्बर ६ मा सबै भन्दा बढी ५ जनामा संक्रमण पुष्टि भएको छ ।

आज थपिएका संक्रमितहरुमा वार्ड नम्बर १५ मा ४ जना, वार्ड नम्बर १, ३, ११ र १३ मा २।२ जनामा तथा वार्ड नमबर ४, ५ र १९ मा १।१ जनामा संक्रमण पुष्टि भएको छ । बुटवलमा आजै १ जनाको मृत्यु भएको थियो । उपमहानगरमा मृत्यु हुनेको संख्या ३ पुगेको छ ।

उता स्वास्थ्य कार्यालय रुपन्देहीले भने पछिल्लो २४ घण्टामा १६ जना मात्र जिल्लामा कोरोना संक्रमित थपिएको जानकारी दिएको छ । स्वास्थ्य कार्यालयका अनुसार १ जना महिला र १५ जना पुरुषमा संक्रमण पुष्टि भएको हो । बुटवल उपमहानगरमा ४ जना, सैनामैना नगरपालिकामा ९ जना, सिद्धार्थ नगर नगरपालिकामा २ जना र तिलोत्तमा नगरपालिकामा १ जना संक्रमित थपिएको स्वास्थ्य कार्यालयको बिज्ञप्तिमा उल्लेख छ ।

स्वास्थ्य कार्यालयले ९७६ जना जिल्लमा संक्रमित पुगेको र ८ जनाको मृत्यु भएको जनाएको छ ।