नेपालगन्ज । पूर्वपश्चिम राजमार्ग अन्तर्गत बाँकेको कुसुम सडकखण्डमा ट्यांकरले मोटरसाईकललाई ठक्कर दिदा दुई जनाको ज्यान गएको छ ।
राप्तीसोनारी गाउँपालिका–१ कुसुमस्थित सौरीखोलामा डिजेल लोड गरेर दाङतर्फ जाँदै गरेको ना ८ ख नम्बरको ट्यांकरले मोटरसाईकललाई ठक्कर दिँदा मोटरसाईकलमा सवार दुई जना गम्भीर घाइते भएका थिए । जिल्ला ट्राफिक प्रहरी बाँकेका निमित्त प्रमुख प्रहरी वरिष्ठ नायब निरीक्षक नन्दप्रसाद पोखरेलले घाइते दुबैजनाको उपचारका क्रममा मृत्यु भएको जानकारी दिए ।
वरिष्ठ नायब निरीक्षक पोखरेलका अनुसार मृत्यु हुनेमा कैलालीको धनगढी–१४ का अन्दाजी ३३–३४ वर्षका रुपेश बस्नेत र सोही उपमहानगरपालिका–३ का अन्दाजी ४५–४६ वर्षिय घमण शाही रहेका छन् ।
पश्चिमबाट पूर्वतर्फ दाङ जाँदै गरेको उक्त ट्यांकरले पूर्वबाट पश्चिमतर्फ जाँदै गरेको मोटरसाईकललाई ठक्कर दिँदा गम्भीर घाइते भएका उनीहरु दुबै जनाको कोहलपुर मेडिकल कलेजमा उपचारका क्रममा मृत्यु भएको हो ।
ठक्कर दिने ट्यांकर र चालकलाई इलाका प्रहरी कार्यालय कुसुमले नियन्त्रणमा लिएको प्रहरीले जनाएको छ ।
प्रतिक्रिया