बुटवल । कोरोना भाइरसको महामारीलाई नियन्त्रण बाहिर जान नदिन बुटवल उपमहानगरपालिकाले लकडाउनको घोषणा गरेको छ ।
बुटवल कोरोना अस्पतालमा बुधबार बिहान २ जनाको मृत्यु भएपछि उपमहानगरपालिकाले बिहीबार राति १२ बजेदेखि भदौ ५ गते राति १२ बजेसम्म लकडाउनको घोषणा गरेको हो ।
उपमहानगरपालिकाका नगरप्रमुख शिवराज सुवेदीले खबरकुरासँग कुरा गर्दै सबै वडामा लकडाउन लगाइएको जानकारी दिए ।
भदौ ५ गतेसम्म लकडाउनकै बीचमा सबै कोरोना संक्रमितहरुको कन्ट्याक्ट ट्रेसिङ गर्ने बताउँदै नगरप्रमुख सुवेदीले त्यतिबेलासम्म नसकिए लकडाउनको अवधी थप गर्ने बताए ।
लकडाउनको अवधीमा उपमहानगरबाट प्रवाह हुने अत्यावश्यक बाहेकका सबै सेवा बन्द गरिने नगरप्रमुख सुवेदीले बताए ।
निजी, सरकारी र सार्वजनिक सेवाका सवारीसाधनमा रोक लगाइनेछ भने वित्तीय संस्थाका कर्मचारीहरू ५० प्रतिशत मात्रै संचालन हुनेछन् ।
ढुवानीका सवारी साधनहरूलाई सुरक्षा मापदण्ड अपनाएर मात्र चल्न दिने निर्णय भएको सुवेदीले बताए ।
लकडाउन अवधीमा खाद्यान्न पसलहरुलाई बिहान ७ बजेदेखि ११ बजेसम्म मात्रै खोल्न अनुमति दिइनेछ । दुध डेरीलाई बिहान ७ देखि ११ बजेसम्म र बेलुका ५ बजेदेखि ७ बजेसम्म मात्रै खुल्न दिइनेछ ।
केही दिन यता बुटवल उपमहानगर क्षेत्रमा कोरोना भाइरसका संक्रमितहरु थपिँदै गएका छन् ।
हालसम्म उपमहानगर क्षेत्रमा ४९ जना संक्रमितहरु भेटिएका छन् । जसमध्ये ३४ जना विभिन्न आइसोलेसन केन्द्रमा उपचार गराइरहेका छन् ।
बुधबार मात्रै बुटवल कोरोना अस्थायी अस्पतालमा कपिलवस्तुका दुई जनाको मृत्यु भएको थियो ।
त्यसमध्ये एक जनामा कोरोना संक्रमण भएको स्वास्थ्य तथा जनसंख्या मन्त्रालयले पुष्टि गरेको छ । अर्का एक व्यक्तिको स्वाव परीक्षणको रिपोर्ट आउन बाँकी रहेको छ ।
प्रतिक्रिया