बाजुरा । बाजुरा जिल्लाको पूर्वीउत्तरी भेगमा रहेको कर्णाली नदीको झोलुङ्गे पुलमाथिबाट नदीको पानी बहन थालेको छ ।
लगातारको वर्षापछि नदीमा बढेको पानीको बहाव पुलमाथि पुगेको हो । पुलमाथि पानी बग्न थालेपछि नदी आरपारको अवस्था बन्द भएको स्थानीय रामलला कार्कीले बताएका छन् ।
‘नदीमा पानीको अत्यधिक बहाव बढेपछि पुलको दुबैतिर रहेको पिलर समेत भत्कने अवस्थामा पुगेको छ’, कार्कीले भने, ‘पुल भन्दा माथिनै पानी पुगेपछि आवतजावतमा निकै समस्या भएको छ ।’
यो पुल स्वामीकार्तिक गाँउपालिका जाने मुख्य पुल हो । दैनिक चार पाँच सय भन्दा बढि मानिस र दैनिक उपभोग्य सामान बोकेका खच्चरले पुलको प्रयोग गर्ने गरेका छन् ।
चार दिन यता पुलमाथिबाटै नदीको बहाव बग्न थालेपछि समस्या भएको स्वामीकार्तिक गाँउपालिका अध्यक्ष चिरञ्जीवी शाहीले बताए ।
कर्णाली नदीमा रहेका आधा दर्जनौ पुल निकै जोखिममा रहेका छन् । वाई वाधु जोड्ने पुल, गोत्रि साप्पाटा पुल, रुगिन मुगु बाजुरा हुम्ला जोडने आधा दर्जन पुल जोखिममा रहेका स्थानीयबासी भरत रोकायाले बताएका छन ।
बाजुरा जिल्लामा रहेका विभिन्न स्थानीय तहका दर्जनौं झोलुङ्गे पुल समेत बनाएका छन् ।
यता साफेँ–मार्तडी सडकखण्डमा पर्ने ताप्रिसेरा–घटेखोला पक्कि पुल र जडाङाको वेलिव्रज पुल अत्यधिक वर्षाका कारण नदीको बहाब बढेपछि भत्काएको छ ।
अहिले जिल्ला सदरमुकाम लगाएत जिल्लाको पूर्वीउत्तरी भेगमा बसोबास गर्ने बासिन्दालाई आवतजावतमा निकै कठिनाई भएको प्रमुख जिल्ला अधिकारी कृष्ण गैरेले बताए ।
जडाङ वेलिव्रज पुल तत्काल बने संभावना नरहेकाले बाजुराबासीले अब केही महिना सास्ती बेहोर्नुपर्ने भएको भन्दै प्रमुख जिल्ला अधिकारी गैरेले यसबारे माथिल्लो निकायमा रिपोर्टिङ गराइसकेको जानकारी दिए ।
प्रतिक्रिया