नेपालगन्ज । नेपाल पत्रकार महासंघको बाँके शाखाको ३ वर्षे कार्यकालका लागि चुनावी सरगर्मी सुरु भएको छ । महासंघको बाँके शाखाले केन्द्रको निर्धारित कार्यक्रम अनुसार अधिवेशन र निर्वाचनको तयारी थालेसँगै चुनावी सरगर्मी सुरु भएको हो ।
नेपाल पत्रकार महासंघ, बाँके शाखाले जेठ २६ गते हुने निर्वाचनका लागि निर्वाचन समिति र १९ गते हुने साधारणसभामा वितरण गरिने पुरस्कार छनौटका लागि छुट्टा छुट्टै समिति गठन गरेको छ ।
शाखाका अध्यक्ष दामोदर भण्डारीको अध्यक्षतामा आज बसेको कार्य समितिको बैठकले खबरकराका प्रबन्ध सम्पादक शरण कर्माचार्यलाई मुख्य निर्वाचन अधिकृत तोकेको छ भने निर्वाचन अधिकृतमा अधिवक्ता केशव कोइराला र पत्रकार दिपेन्द्र धिताललाई नियुक्त गर्ने निर्णय गरेको छ ।
महासंघको १४ औं सभाधारण सभामा वितरण गरिने विभिन्न पुरस्कारको छनौटका लागि पत्रकार रुद्र सुवेदीलाई छनौट समितिको संयोजक बनाइएको छ । छनौट समितिको सदस्यमा डा. डक्ट धिताल र नविन गिरी रहेका छन् ।
सचिव कमल डाँगीका अनुसार, शाखाको अधिवेशन एवं १४ औं साधारण सभा जेठ १९ गते गरिदैछ । त्यसका लागि अध्यक्ष भण्डारीको संयोजकत्वमा मूल आयोजक समिति गठन गरिएको छ ।
प्रतिक्रिया