कोशीमा मुख्यमन्त्री नियुक्ति विरुद्ध एमाले सर्वोच्चमा, आइतबार पेशी

काठमाडौं । नेकपा एमालेले कोशी सरकार गठन विरुद्ध सर्वोच्चमा रिट दायर गरेको छ । आज बिहान मात्र सपथ लिएका प्रदेशका मुख्यमन्त्रीमा उद्धव थापा नेतृत्वको सरकार अवैधानिक भन्दै नेकपा एमाले सर्वोच्च अदालत पुगेको हो ।

एमालेको तर्फबाट निवर्तमान मुख्यमन्त्री एवं एमाले संसदीय दलका नेता हिम्मत कार्कीले बारेसमार्फत रिट दायर गरेका हुन् । रिटमाथि आइतबार सुनुवाइ हुनेभएको छ ।

रिटमा मुख्यमन्त्री थापा, प्रदेश प्रमुख पर्शुराम खापुङ र सभामुख बाबुराम गौतमलाई विपक्षी बनाइएको छ । सरकार गठनको क्रममा गठबन्धन दलहरुले सभामुखको हस्ताक्षर समेत प्रयोग गरेको भन्दै एमाले त्यस विरुद्ध सर्वोच्चमा रिट दायर गरेको हो ।

कार्कीले आफ्नो रिटमा संविधानको धारा १६८ (२) बमोजिम सरकार गठन गर्दा सभामुखलाई समेत समावेश गरिनु संविधान विपरीतको कार्य भएको दावी गरेका छन् ।