मतदानको निर्धारित समय सकियो

काठमाडौं । प्रतिनिधिसभा र प्रदेशसभा निर्वाचनको मतदानको निर्धारित समय सकिएको छ ।

बिहान ७ बजेदेखि सुरु भएको मतदान साँझ ५ बजे सकिएको हो । यद्यपी, मतदानस्थलभित्र ५ बजेअघि नै प्रवेश गरेका मतदाताले भने मतदान गर्न पाउनेछन् । यसैगरी केही स्थानमा झडप भएका कारण रोकिएको मतदानको समय पनि थप गरिएको छ ।

निर्वाचन आयोगले देशभर छिटपुट घटनाबाहेका शान्तिपूर्ण रुपमा मतदान सम्पन्न भएको जनाएको छ । तर, आयोगले दाबी गरेअनुसार मतदाताको उत्साहपूर्वक उपस्थिति भने मनाङ र मुस्ताङ जिल्लामा बाहेक अन्त देखिएन । आयोगले देशभर ७० प्रतिशत मतदान हुने दाबी गरेको थियो ।

निर्वाचन सम्पन्न भएका क्षेत्रमा आजै रातिबाट मतगणना हुने आयोगले जनाएको छ । काठमाडौं लगायत तराईका जिल्लामा आजै रातिबाट मतगणना कार्य सुरु हुने प्रमुख निर्वाचन आयुक्त दिनेशकुमार थपलियाले जनाएका छन् ।