ओलीले सांसदहरुलाई गरे बिदाई, गाउँ गएर पार्टीलाई विजयी बनाउन निर्देशन

काठमाडौं । नेकपा एमालेका अध्यक्ष केपी शर्मा ओलीले पार्टीका सांसदलाई बिदाइ गरेका छन् ।

शुक्रबार संसद् भवन नयाँ बानेश्वरमा बसेको एमाले संसदीय दलको बैठकमा अध्यक्ष ओलीले सांसदहरूलाई बिदाइ गरेका हुन् ।

उनले सांसदहरूलाई ४ मंसिरमा हुने निर्वाचनमा लाग्न निर्देशनसमेत दिए । ओलीले अब सबै सांसदहरुलाई गाउँ फर्किन र पार्टीलाई आगामी चुनावमा विजयी बनाउनेगरी खटिन निर्देशन समेत दिए । त्यसक्रममा ओलीले भनेका थिए, ‘सरकारले संसदको कार्यकाल लम्ब्याउने प्रपञ्च गर्‍यो । तर हाम्रोलागि भोलिदेखि संसदको कार्यकाल सकिएको छ, भोलिदेखि हामी संसदमा आउँदैनौं ।’

अध्यक्ष ओलीले अहिलेसम्म सांसदको रुपमा खेलेको भूमिका लागि सबै सांसदलाई धन्यवाद पनि दिए ।

२ असोजमा समानुपातिकको बन्दसूची बुझाउने कार्यतालिका भएकोले संसदको कार्यकाल सोही दिन सकिँदै छ ।

सोही कारण एमालेले शुक्रबार नै सांसदहरूलाई बिदाइ गरेको हो ।