म्याग्दी । सडक निर्माण सुरु भएको पाँच वर्ष भइसक्दा समेत ट्र्याक निर्माणले पूर्णता पाउन नसकेपछि चन्दा सङ्कलन गरेर धार्मिक पर्यटकीय सडक निर्माण गरिएको छ ।म्याग्दीको प्रसिद्ध धार्मिक स्थल मालिकाधुरीको सडक निर्माणमा देशविदेशबाट समुदायले १२ लाख रुपैयाँ सङ्कलन गरी सडक निर्माण गरेका छन् ।
पैदलयात्रा गरेर मालिकाधुरी पुग्न तीन घण्टा लाग्थ्यो, अहिले समुदायले सडक निर्माण गरेपछि मालिकाधुरीको यात्रा एक घण्टामा समेटिएको छ ।’ सडक निर्माण उपभोक्ता समितिका अध्यक्ष मनबहादुर छन्त्यालले भने । देश तथा विदेशमा रहेका ठाडाखानीवासीबाट चन्दा सङ्कलन गरेर सडकलाई जोगी देउराली डाँडासम्म पुर्याइएको उनले बताए ।
म्याग्दीकै ठाडाखानीबाट तीन घण्टा पैदलयात्रा गरेपछि बल्ल पुगिने मालिकाधुरी, सडक निर्माण भएपछि एक घण्टामै पुग्न सकिने छ । ठाडाखानीबाट सरघारी हुँदै जोगीदेउराली डाँडासम्म सडक निर्माण भएको रघुगङ्गा-६ का वडासदस्य टेकजित छन्त्यालले जानकारी दिए ।
चालु आर्थिक वर्षमा गाउँपालिकाबाट विनियोजन भएको ८ लाख रुपैयाँ बजेट र समुदायको अगुवाइमा थपिएको १२ लाख रुपैयाँ जुटाएर सडक निर्माण गरिएको उपभोक्ता समितिले जनाएको छ ।
गत वर्ष गाउँपालिकाबाट १० लाख रुपैयाँ र स्थानीयवासीको चन्दा सङ्कलनबाट ८ लाख रुपैयाँ बजेट जुटाएर सरघारीसम्म सडकको ट्याक निर्माण गरिएको थियो ।
अहिले सडकको ट्र्याक पुगेको देउरालीधुरीमा सवारीसाधन पार्किङका लागि जग्गा सम्याइएको उनले जानकारी दिए ।
प्रसिद्ध धार्मिकस्थल मालिकाधुरी पुग्ने सडकको ट्याक निर्माणमा पालिकाको बजेटमा श्रमदान र सहयोग जुटाएर लक्ष्यभन्दा बढी काम गरी उपभोक्ता समितिले उदाहरणीय काम गरेको गाउँपालिकाका प्रमुख प्रशासकीय अधिकृत चेतनारायण भण्डारीले बताए ।
“हामीले सडकको अनुगमन पनि गरेका छौँ, पालिकाको बजेटभन्दा बढी रकम समुदायस्तरबाट जुटाएर निर्माणमा खर्च गरेको पाएका छौँ, विकासमा सरकार र समुदायको साझेदारीले उल्लेख्य उपलब्धि हासिल गर्न सकिन्छ भन्ने उहादरण ठाडाखानीवासीले दिएका छन्”, उनले भने । प्रमुख प्रशासकीय अधिकृत भण्डारीका अनुसार मालिकाधुरी जानका लागि मालिका गाउँपालिकाको बिमबाट सडक निर्माण भइरहेको छ ।
समुद्री सतहबाट ३ हजार ४ सय मिटरको उचाइमा अवस्थित मालिकाधुरीमा आन्तरिक तथा बाह्य पर्यटक भित्र्याउने उद्देश्यले सडकको पहुँचसँगै अन्य पर्यटन पूर्वाधार निर्माणमा जोड दिइएको गाउँपालिकाले जनाएको छ ।
म्याग्दीका ३५ भन्दा बढी गाउँ देख्न सकिने मालिकाधुरीबाट सिस्ने, गुर्जा, मानापाथी, धौलागिरि, नीलगिरि, अन्नपूर्ण, माछापुच्छ्रे, मनास्लुलगायत २० भन्दा बढी हिमशृङ्खलाको लहरै दृश्यावलोकन गर्न सकिन्छ भने यहाँबाट सूर्योदयको दृश्य मनमोहक देखिन्छ ।
मालिका क्षेत्रको जङ्गलमा पाइने लालीगुराँस, वन्यजन्तु, पशुपक्षी, विभिन्न प्रजातिका फूल, जडीबुटी र वन पैदावार थप आकर्षण हुन् । पर्यटकीयस्थलको रूपमा विकास गर्न लागिएको मालिकाधुरीमा पूजा गरेमा मनोकामना पूरा हुने धार्मिक विश्वास रहिआएको छ ।
चण्डी पूर्णिमा, ज्येष्ठी पूर्णिमा, भाइटीका र बालाचर्तुदर्शीमा यहाँ विशेष पूजा गरिन्छ । मालिका, कालिका र जाल्पादेवीको मूर्ति रहेको मालिका मन्दिरमा भाकल पूरा भएमा बोका र परेवाको बलि चढाउने चलन रहेको स्थानीय बताउँछन् ।
विसं १९१० देखि पूजाआजा हुने गरेको इतिहास रहेको मालिकामा पछिल्लो समय बलिको विकल्पमा नरिबल चढाउने चलन बसाइएको छ । भगवान् शिव र पार्वती भ्रमणमा आएका बेला पार्वतीको माला खसेकाले मालिका नाम रहन गएको किंवदन्ती रहेको स्थानीय ज्येष्ठ नागरिक बताउँछन् ।
प्रतिक्रिया