खजुरा । संघीय सरकारले स्वामित्वमा लिएको १० वर्ष सम्म बिना दरबन्दी संचालन गरिएको सुशिल कोइराला प्रखर क्यान्सर अस्पतालमा आउने हरेक कार्यकारी निर्देशकहरु आएको केही महिनामा ‘भाग्ने’ गरेका छन् । अस्पतालमा पठाइएका हरेक निर्देशकहरु आफै सरुवा मागेर अन्यत्र जाने गरेको पाइएको छ ।
दरबन्दी बिना करार र ज्यालादारी चिकित्सक र कर्मचारीबाट चलेको क्यान्सर अस्पतालका कार्यकारी निर्देशकहरु अख्तियारको अनुसन्धानमा पर्ने त्रासमा अस्पतालमा बस्न नमान्ने गरेको स्रोतको दाबी छ । अस्पतालमा हालै संचालनमा ल्याइएको क्यान्सर रोगको सेकाउने लिन्याक मेसिन खरिदमा भएको गडवडीका कारण अस्पताल प्रमुखहरु अस्पतालमा बस्न नमान्ने गरेको बताइएको छ ।
लिन्याक मेसिन खरीद गर्दा सप्लाई गर्ने कम्पनीबाट खरिद सम्झौता भन्दा विपरितको एचएस कोड र कन्ट्री अफ ओरिजिनको मेसिन अस्पतालमा झरेपछि अख्तियार दुरुपयोग अनुसन्धान आयोगमा मुद्दा परेको स्रोतको भनाई छ । स्रोतका अनुसार फरक एचएस कोड र कन्ट्री अफ ओरिजिनको मेसिनको भुक्तानी गर्दा फसिने त्रासले कार्यकारी प्रमुख नटिक्ने गरेका हुन् । त्यसो त अस्पताल प्रशासनले फरक परेको कोड र कन्ट्री अफ ओरिजिनका बारेमा सहजिकरण गरिदिन पटक पटक स्वास्थ्य मन्त्रालयलाई पत्र पठाएपनि मन्त्रालयले वास्ता नगरेपछि लिन्याक मेसिन खरिदको विवाद कायम रहेको छ ।
२०७९ पुसमा अस्पतालमा झरेको मसिन विवादकै कारण संचालनमा नल्याइएकोमा ३ महिना अघिदेखि मात्र संचालनमा आएकोथियो । अस्पतालका पछिल्ला निर्देशक डा. प्रकाश प्रसाद साहले भुक्तानीको आश्वासन दिँदै सप्लायर्सबाट प्राबिधिक झिकाएर लिन्याक संचालन गराएका थिए । मेसिन चलेपछि सप्लायर्सले भुक्तानी मागेपछि डा. साह पनि अस्पतालबाट सरुवा मागेर हिँडेका छन् । मन्त्रालयले सहजिकरण नगरिदिएपछि फंसिने डरले साह आफै सरुवा मागेर हिँडेको स्रोतको दाबी छ । यद्देपी डा. साहले मसिन संचालनमा ल्याउन सहजिकरण गरिदिने मन्त्रालय र सरोकारवालाई धन्यवाद दिएका छन् । खबरकुरासंग कुरा गर्दै उनले घरयासी कारणले आफुले घरपायक पर्ने ठाँउमा सरुवा मागेको स्वीकार गरे । उनले मेसिन संचालन भएपनि भुक्तानी हुन नसक्दा मेसिनमा आउने प्राबिधिक खराबीकोे समस्या समाधान गर्न चुनौती देखिएको बताए ।
डा. निरज भट्टराईको कार्यकालमा मन्त्रालयलाई सहजिकरणका लागि भएको आग्रह बमोजिम मन्त्रालयबाट छानबिन समिति समेत गठन भएको थियो । छानबिन समितिले खरिद सम्झौता र भन्सार भएको कागजमा एचएस कोड र कन्ट्री अफ ओरिजिन फरक परेको स्वीकार गर्दै मसिनको गुणस्तरका विषयमा संचालनमा आएपछि भन्न सकिने प्रतिवेदन मन्त्रालयलाई बुझाएको थियो । सोही प्रतिवेदनका आधारमा मसिन जडान भइ संचालनमा आएपनि फरक परेको कोड र कन्ट्री अफ ओरिजिनका बारेमा मन्त्रालयबाट ठोस निर्णय नहुँदा मेसिनको बाँकी रकम भुक्तानी रोकिएको छ ।
२७ करोड बढी मूल्यमा खरिद सम्झौता भएको मेसिनको ६० प्रतिशत रकम सप्लायर्शले लगिसकेको छ भने ८ लाख ६ हजार डलर अझै भुक्तानी दिनुपर्ने देखिएको अस्पताल प्रशासनले जनाएको छ ।
मेडि सोलुसनले सप्लाई गरेको नयाँ मेसिन खरिद लन्डनबाट सप्लाई दिने सम्झौता भएको तर भन्सार प्रज्ञापन पत्र र खरिद सम्झौतामा मेसिनको कन्ट्री अफ ओरिजिन र एचएस कोड फरक पाएपछि मेसिनको भुक्तानी हुन नसकेको हो । स्वास्थ्य मन्त्रालयले एक टिमले मेसिन जडान गर्ने र त्यसको प्रतिफल कस्तो दिन्छ त्यस आधारमा रकम भुक्तानी दिने निर्देशन दिएपनि मसिन चलिसकेपछि पनि भुक्तानी प्रक्रिया अगाडी नबढेको सप्लायर्सको भनाई छ ।
सप्लायर्सले भुक्तानी नपाउँदा संचालनमा रहेको मसिनमा प्राबिधिक खराबी आए वारेन्टी समयावधिको सुबिधा कम्पनीले नदिने समस्या रहेको अस्पतालका एक चिकित्सकले बताए । वारेन्टी बमोजिम सुविधा नपाउँदा मसिन बिग्रेकै दिनबाट सेवा प्रभावित हुने ती डाक्टरले बताए । होल हरेक दिन २५ जना क्यान्सरका बिरामीले रेडियो थेरापीको सेवा अस्पतालबाट लिँदै आएका छन् ।
प्रतिक्रिया