नेपालगन्ज । सरकारी निकायमा समन्वय नहुँदा नसर्ने रोगको न्युनिकरणमा प्रभावकारी सचेतना जाग्न नसकेको सरोकारवालाहरुले बताएका छन् । आइतबार नेपालगन्जका सञ्चारकर्मीका लागि नसर्ने रोग पहिचान, रोकथाम र नियन्त्रणका लागि अभिमुखीकरण अन्तरक्रिया र पैरवी गोष्ठी तथा स्क्रिनिङ जाँच कार्यक्रममा बोल्नेवक्ताहरुले नसर्ने रोगका लागि अपनाउनुपर्ने उपायहरुका विषयमा सरकारी निकायको संयुक्त अभियान हुनु पर्ने सुझाए ।
उनीहरुले स्वास्थ्य कार्यालयले स्वस्थकर खाना मात्र सेवन गर्न सचेतना फैलाइरहँदा गुणस्तर नियन्त्रण कार्यालयले अखाद्य सामाग्रीको अनुगमन गर्ने नगरेको टिप्पणी गरे । सरकारकै स्वास्थ्य निमायले सुर्तिजन्य र मदिराजन्य पदार्थ सेवन गर्ने नहुने बताइरहँदा सरकारकै अर्को निमायले सुर्ति र मदिरा उत्पादनको अनुमतिपत्र बांडिरहँदा नसर्ने रोग बढ्दै गएको उनीहरुको भनाई छ ।
सरकारले फागुन महिनाको पहलो साताबाटै ३० वर्ष माथिका मानिसमा नसर्ने रोगको अवस्था बुझ्न अभियान सञ्चालन गर्दै आएको छ । सोही सन्दर्भमा आज बाँकेका पत्रकारहरुलाई अभिमुखिकरण सहित स्क्रिनिङ जाँच गरिएको हो ।
कार्यक्रममा बोल्दै स्वास्थ्य कार्यालय, बाँकेकी प्रमुख सुनिता पौडेलले सय जनाको मृत्यु हुँदा ६६ जना नसर्ने रोगका कारण मृत्यु भइरहेको बताउँदै जीवनशैली र खानपान नसुधारे नसर्ने रोगको जोखिम अझै बढ्ने बताइन् । रोग लाग्न नदिन नियमित अभ्यास, हिडाई, घरमै उत्पादित खानेकुरा खानमा जोड दिँदै उनले आहार बिहार नै नसेर्ने रोग न्युसनकरणको मुख्य उपाय भएको बताइन् ।
उनले पछिल्लो पटकको तथ्याङ्क अनुसार हुने मृत्युको कारणमा ६३ प्रतिशत नसर्ने रोगको कारण हुनेगरेको जानकारी दिदै समय–समयमा नियमित स्वास्थ्य जाँच र खानपानमा विषेश ध्यान दिन आग्रह गरिन ।
कार्यक्रममा जनस्वास्थ्य अधिकृत नरेशबाबु श्रेष्ठले बाँकेमा नसर्ने रोगको अवस्था, नसर्ने रोगको प्रभावबाट जोगिन अपनाउनुपर्ने सावधानी लगायतका बारेमा जानकारी गराए ।
श्रेष्ठले प्रस्तुतिकरण गर्दै नसर्ने रोगको नियमित परीक्षण गर्नु पर्ने बताए । उनले दैनिक पसिना निकाल्ने गरि ब्यायाम गर्नुपर्नेमा जोड दिँदै सन्तुलित भोजन र शारिरीक अभ्यासबाट नसर्ने रोग लाग्न रोक्न सकिने बताए ।
वरिष्ठ पत्रकार निरज गौतमले नागरिकको स्वास्थ जीवनमा सरकारको सबै निकायको साझा धारणा हुनुपर्ने बताए । उनले अभिमुखिकरणमा स्वास्थसँग गाँसिएका सरकारी निकायलाई पनि सहभागी बनाउन सुझाव दिए ।
मधुमेह, रक्तचाप, क्यान्सर, मृर्गौला सम्बन्धी रोग यसमा पर्छन् ।
प्रतिक्रिया