बुटवल । शाइन रेसुङ्गा डेभलपमेन्ट बैंकको १७ औं वार्षिकोत्सवको अवसरमा आयोजित ‘शाइन रेसुंगा राष्ट्रिय टेन के रन’को खुल्लातर्फको महिला एवं पुरुष तर्फको उपाधि सन्तोषी श्रेष्ठ र मिङमार सिङगी तामाङले हात पारेका छन् ।
सन्तोषीले आयोजक शाइन रेसुङ्गा बैकको केन्द्रिय कार्यालय कालिकानगर देखि तिलोत्तमाको मणिग्राम हुँदै पुनस् बैंक परिसर सम्मको निर्धारित दुरी ३६ दशमलव २१ सेकेन्डमा पुरा गरिन् भने मिङमारले ३१ मिनेट ५३ सेकेण्डमा पूरा गर्दै उपाधि हात पारेका हुन् ।
‘रन टु शाइन’ नाराका साथ शाइन रेसुङ्गा डेभल्पमेन्ट बैंकको १७ औं वार्षिकोत्सवको अवसरमा आईतबार आयोजित प्रतियोगितामा उपाधि सहित सन्तोषी र मिङमारले समान नगद एक–एक लाख रुपैयाँ पुरस्कार प्राप्त गरेका छन् ।
दौडमा पूर्णराज्य लक्ष्मी न्यौपाने दोस्रो, पुष्पा भण्डारी तेस्रो, आशा रावल चौथों र नारायणी भण्डारी पाँचौं स्थानमा तथा पुरुषतर्फ नागेश्वर ऐर दोस्रो, गणेशसिंह रावत तेस्रो, सन्जीव नेपाली चौथों र अक्कल बडुवाल पाँचौं स्थानमा आएर पुरस्कृत भए । दुवै विधाका दोस्रोले ४० हजार, तेस्रोले २० हजार, चौथोंले १५ हजार र पाँचौं हुनेले १० हजार रुपैयाँ प्राप्त गरेका छन् ।
यस्तै, स्थानीय पाँच किलोमिटर दौडमा पुजा पछाई र शिव रायमाझी विजेता बनेका छन् । महिलामा तेजमाया कुँवर दोस्रो, प्रकृति घिमिरे तेस्रो र प्रतिभा केवर चौथौं हुँदा पुरुषतर्फ अजय पाण्डे दोस्रो, मुकेश थारु तेस्रो र प्रेमलाल कोहार चौथो हुदै पुरस्कृत भए ।
यस्तै भेट्रान्समा महिलातर्फ मनकुमारी रायमाझी पहिलो र गोमा सुबेदी दोस्रो बनेका छन् । पुरुषतर्फ युव बहादुर राना प्रथम, गोबिन्द थापा दोस्रो, केशर सिंह महत तेस्रो र टेकबहादुर बुढाथोकी चौथों भएका छन् । दुवै विधाका विजेताले १५ हजार, दोस्रोले १० हजार, तेस्रोले ५ हजार, चौथोंले २ हजार ५ सय रुपैयाँ प्राप्त गरे ।
विजयी धावकहरुलाई प्रतियोगिताका सद्भावना दुत एवं किर्तिमानी धावक बैकुण्ठ मानन्धर, लुम्बिनी प्रदेश सांसद एवं पुर्व मन्त्री विष्णु पन्थी, बैंकका अध्यक्ष थानेश्वर पौडेल र बैंकका प्रमुख प्रशासकीय अधिकृत प्रकाश पौडेलले पुरस्कार वितरण गरेका थिए । तीन विधामा १६ सय धावकले नाम दर्ता गराएकामा ६ सयजनाले प्रतिस्पर्धा गरेका थिए ।
काठमाडौं बाहिर केन्द्रीय कार्यालय रहेको ‘ख’ बर्गको शाइन रेसुङ्गा डेभलपमेन्ट बैंक १७ औ बर्षमा प्रवेश गरेको अवसरमा बिभिन्न कार्यक्रम गरि वार्षिकोत्सव मनाएको छ । बैंकको अधिकृत पुँजी ८ अर्व, जारी पुँजी ४ अर्व ८७ करोड र चुक्ता पुँजी पनि ४ अर्व ८७ करोड रुपियाँ रहेको छ । २०८१ पुस मसान्तसम्मको वित्तीय विवरण अनुसार बैंकको निक्षेप संकलन ६९ अर्ब ७२ करोड रहेको छ । कर्जा लगानीतर्फ ५७ अर्ब ४९ करोड रहेको छ ।
जसमा ब्यापार कर्जा १८ दशमलव ९१ प्रतिशत, कृषि कर्जा ५ दशमलब ९१ प्रतिशत, आवास निर्माण कर्जा ३ दशमलब ८२ प्रतिशत, विपन्न बर्ग कर्जा ५ दशमलब ८९ प्रतिशत, जग्गा खरिद कर्जा ४ दशमलब ९५ प्रतिशत, होटल तथा पर्यटन कर्जा १६ दशमलब ८५ प्रतिशत, उद्योग कर्जा १४ दशमलब २१ प्रतिशत, उपभोग्य कर्जा २० दशमलब ३५ प्रतिशत, हायरपर्चेज कर्जा १ दशमलब ४८ प्रतिशत रहेको छ भने अस्पताल, शिक्षा आदीमा ६।५५ प्रतिशत र अन्य कर्जा १।०८ प्रतिशत रहेको बैंकले जनाएको छ ।
बैंकले आर्थिक बर्षमा २०८०÷०८१ मा ब्याजकर, पारिश्रमिक कर लगायत अन्य शीर्षकमा गरी श्रोतमा कर कट्टीतर्फ ३५ करोड ५७ लाख ८० हजार, आयकर तर्फ ३७ करोड ०६ लाख ६६ हजार गरी कुल ७२ करोड ६४ लाख ४६ हजार रुपियाँ सरकारी कोषमा जम्मा गरेको छ ।
बैंकले आर्थिक बर्ष २०८०÷०८१ मा इण्डियन च्याम्बर अफ कमर्सवाट आयोजित दोस्रो इमर्जिङ एशिया बैंकिङ अवार्डमा बेस्ट पर्फमेन्स अन प्रोफिटाबिलिटी, बेस्ट पर्फमेन्स अन ग्रोथ र बेस्ट बैंक शीर्षकमा रनर उपाधिबाट सम्मानित भएको थियो ।
यस्तै नेपाल चार्टर्ड एकाउन्टेन्ट्स संस्थाद्वारा नेशनल बेस्ट प्रेसिडेन्टल एनुअल रिपोर्ट अवार्ड २०२३ मा सर्टिफिकेट अफ मेरिट र न्यु बिजनेश एज प्रा।लि। वाट बेस्ट म्यानेज्ड डेभलपमेन्ट बैंक अफ दि इअर २०२४ वाट सम्मानित भएको थियो ।
बैंकका अध्यक्ष थानेश्वर पौडेलले निक्षेप तथा कर्जा लगानीलाई सन्तुलित रूपमा बृद्धि गर्ने, कर्जाको गुणस्तरमा विशेष ध्यान दिई ग्रामीण क्षेत्रमा कृषि, साना तथा मझौला उद्यम लगायतका क्षेत्रहरूमा लगानी बिस्तार गर्ने, डिजिटल कारोवारलाई थप सुरक्षित र भरपर्दो बनाउदै उत्कृष्ट विकास बैंक बन्ने लक्ष्य सहित अघि बढेको बताए ।
बैंकका प्रमुख कार्यकारी अधिकृत प्रकाश पौडेलले काठमाडौं बाहिर केन्द्रीय कार्यालय रहेको लुम्बिनी प्रदेशको एकमात्र राष्ट्रियस्तरको यो विकास बैंकलाई धेरैभन्दा धेरै सेवाग्राहीको बैंक वनाउने प्रतिवद्धता व्यक्त गरे ।
उनले बैंक सुशासन, स्पष्ट भिजन र दिशासहित अघि बढेको बताउँदै वित्तीय अनुशासनको पाटोलाई बैंकले मुख्य जोड दिएको बताए । बिगतमा सबै सरोकारवाला क्षेत्र आर्थिक अनुशासनमा नरहँदा त्यसको असर बैंक व्याजदरमा परेको स्मरण गर्दै पौडेलले बैंकिङ क्षेत्रमा अनुशासन जरुरी रहेको उल्लेख गरे । उनले डिजिटल बैंकिङ तथा युवा उद्यमशीलता कार्यक्रमका कारण युवा पुस्तामाझ बैंक लोकप्रिय बनेको उल्लेख गरे ।
बैंकले वार्षिकोत्सवक अवसरमा यसवर्ष उत्कृष्ट शाखाको रुपमा कतरनिया शाखा बर्दिया, सूर्यपुरा शाखा रुपन्देही, खैरेनी शाखा गुल्मी, बिजुवार शाखा प्युठान र योगीकुटी शाखा रुपन्देहीलाई बेस्ट म्यानेज्ड ब्रान्च अवार्डबाट सम्मान गरेको छ ।
प्रतिक्रिया