काठमाडौं । राष्ट्रिय स्वतन्त्र पार्टी रास्वपाका सभापति रवि लामिछाने पक्राउको विरोधमा सो पार्टीका कार्यकर्ताहरुले काठमाडौं र पोखरामा विरोध प्रदर्शन गरेका छन् ।
काठमाडौंको माइतीघर र पोखराको मानवअधिकार चोकमा भएको प्रदर्शनमा रास्वपाका सयौं नेता कार्यकर्ता सहभागी भएका छन् । पोखरामा भएको प्रदर्शनमा रास्वपाका केन्द्रीय नेताहरुदेखि विभिन्न जिल्लाबाट पोखरा पुगेका नेता कार्यकर्ताको उपस्थिति रहेको छ ।
सरकारले राजनीतिक प्रतिशोधका आधारमा आफ्ना सभापतिलाई पक्राउ गरेको भन्दै रास्वपाले प्रदर्शनको आयोजना गरेको हो । प्रहरीले सहकारी ठगी र संगठित अपराध गरेको अभियोग लगाउँदै लामिछानेलाई शुक्रबार साँझ पार्टी कार्यालयबाट नियन्त्रणमा लिएर राति नै पोखरा लगेको थियो । सहकारी पीडितहरुले पोखरामा उनी विरुद्ध उजुरी गरेका छन् ।
तर रास्वपाले भने सहकारीका वास्तविक ठगहरुलाई जोगाउन, भ्रष्टाचारका अन्य घटनाहरु लुकाउन सरकारले राजनीतिक प्रतिशोध साँधेर आफ्ना सभापति पक्राउ गरेको आरोप लगाएको छ ।
प्रतिक्रिया