काठमाडौँ । संसदमा रहेका विपक्षी दलको बैठकले एमाले अध्यक्ष केपी शर्मा ओली नेतृत्वको सरकार असफल भएको निस्कर्ष निकालेको छ ।
प्रमुख प्रतिपक्षी दल नेकपा माओवादी केन्द्रका अध्यक्ष पुष्पकमल दाहाल प्रचण्डले आह्वान गरेको बैठकले सरकार जनतालाई सेवा दिन र सुशासन कायम गर्न असफल भएको निस्कर्ष निकालेको हो ।
बैठकमा नेताहरुले बाढी पहिरो पीडितको राहत र उद्धारको सवालमा सरकारको भूमिका गैरजिम्मेवार देखिएको, सुशासन कायम गर्न नसकेको, भ्रष्टाचार झन मौलाएको, विपक्षी दलहरुलाई फुटाउन अध्यादेश ल्याउन षड्यन्त्र गरेको विषयमा बोलेका थिए । सरकार पार्टीगत र निहीत स्वार्थलाई प्राथमिकता राखेको महसुस भएको बैठकपछि माओवादी नेता शक्ति बस्नेतले बताए ।
उनीहरुको सरकारको गैरजिम्मेवार कदम विरुद्ध प्रतिवाद गर्ने साझा समझदारी गरेका छन् ।
बैठकले कात्तिक ५ गते सरकारलाई ज्ञापनपत्र बुझाउने निर्णय गरेको छ । पछिल्लो राजनीतिक घटनाक्रम र बाढीपहिरो लगायत जनसरोकारका विषयमा विभिन्न सुझाव संकलन गरेर सरकारलाई ज्ञापन पत्र बुझाउने निर्णय भएको बैठकपछि माओवादी नेता बस्नेतले जानकारी दिए ।
बैठकमा नेकपा (माओवादी केन्द्र, राष्ट्रिय स्वतन्त्र पार्टी (रास्वपा), राष्ट्रिय प्रजातन्त्र पार्टी (राप्रापा), नेकपा (एकीकृत समाजवादी), आम जनता पार्टी (आजपा)का शीर्ष नेताहरुको सहभागिता थियो । सो बैठकमा सत्तामा रहेको लोकतान्त्रिक समाजवादी पार्टी लोसपाका अध्यक्ष महन्थ ठाकुर पनि सहभागी थिए ।
प्रतिक्रिया