नेपालगन्ज । बाँके प्रहरीले प्राचीन स्मारक बुद्धको मुर्ति सहित ३ जनालाई पक्राउ गरेको छ । प्रहरीले बाँके राप्तिसोनारी गाउँपालिका वडा न. ८ ढकेरी शम्सेरगन्जबाट प्राचीन स्मारक बुद्धको मुर्ति सहित ३ जनालाई पक्राउ गरेको हो ।
पक्राउ पर्नेहरुमा रुपन्देही तिलोत्तमा ११ बस्ने ५० वर्षिय खिम बहादुर कुँवर, सोही स्थानका ५० वर्षिय रामु न्यौपाने र दाङ घोराही उपमहानगरपालिका वडा न. १५ बस्ने ५८ वर्षिय निम बहादुर कुँवर रहेका छन् ।
प्रहरीका अनुसार राप्तीसोनारी ८ ढकेरीको सडकखण्डमा शंकास्पद रुपमा हिँडिरहेका उनीहरुमध्य खिमबहादुरले पछाडी बोकेको खैरो रङको झोला खोली हेर्दा ओमनमः शिवायः लेखिएको तुल (रुमाल) मा बेरी लुकाई राखिएको पिँधको गोलाई १ फिट ६ ईन्च , पिध देखि शिरको टुप्पो सम्मको उचाई ९ ईन्च, तौल गर्दा ८ किलो ६८० ग्राम भएको पहेंलो रङ्गको धातुमा अधिकांश भागमा कालो रङको पालिस लगाएको जस्तो देखिने बुद्धको मुर्ति फेला परेको प्रहरीले जनाएको छ । सोही झोलाबाट ८ ईन्च लम्बाई कटर थान १, ८ ईन्च लम्बाई भएको पिलास थान १, ८ ईन्च लम्बाई भएको फलामको रेति थान १, र भारतिय सिमकार्ड १ थान बरामद भएको बाँके प्रहरी प्रवक्ता प्रहरी नायव उपरीक्षक नारायण डाँगीले बताए ।
पक्राउ परेकाहरुमाथि आवश्यक अनुसन्धान प्रक्रिया अगाडी बढाईएको प्रहरीले जनाएको छ ।
प्रतिक्रिया