गुल्मी । पैचो पसल प्रालीले गुल्मीको छत्रकोटमा पैचो नमुना कृषि उत्पादन केन्द्र सञ्चालनमा ल्याएको छ ।
छत्रकोट गाउँपालिका वार्ड नं. ५ खज्र्याङ्गमा करिब ६० रोपनीमा आधुनिक प्रविधिको प्रयोग गरी टमाटर खेती शुभारम्भ गरी नमुना कृषि उत्पादन केन्द्र संचालनमा आएको हो ।
सोमबार (वैशाख १७ गते) एक कार्यक्रमका बीच छत्रकोट गाउँपालिकाका प्रमुख रामप्रसाद पाण्डेले सो नमुना केन्द्रको शुभारम्भ गरेका छन् ।
कृषिलाई चक्लाबन्दी संरचनामा लगेर व्यवसायिक उत्पादन गर्न पैचो नमुना कृषि उत्पादन केन्द्र सञ्चालनमा ल्याएको सो कम्पनीले जनाएको छ ।
कार्यक्रमको शुभारम्भ गर्दै गाउँपालिकाका अध्यक्ष पाण्डेले पैचोले राम्रो कामको सुरुवात गरेकोमा खुशी व्यक्त गरे । पाण्डेले भने, ‘बाँझो जग्गामा काम गर्न हामीले गर्न खोजेका थियौं । तर हामीले सकेनौं पैचोले काम गरेकोमा धन्यवाद दिनुपर्छ । यो सबैले आएर सिक्न जरुरी छ ।’ अध्यक्ष पाण्डेले भने, ‘आजसम्म बजारीकरणमा मात्र रहेको पैचोले उत्पादानमा सहभागी भैरहेकोमा वन्जर र रुखो क्षेत्रमा समेत यस्तो राम्रो काम गरेर कृषिको व्यवसायिकण गर्न लागेकोमा म खुशी भएको छु ।
यस्तै, कृषि ज्ञान केन्द्र गुल्मीका प्रमुख नवराज नवराज भण्डारीले पैचोले सराहनीय काम गरेको बताए । उनले पैचोको एकीकृत उत्पादन मोडलले अरु व्यवसायिक किसानलाई पनि हौसला थप्ने विश्वास व्यक्त गरे ।
कार्यक्रममा नमुना कृषि केन्द्रबारे जानकारी दिँदै पैचोका प्रबन्ध निर्देशक धु्रवराज न्यौपानेले प्रथम चरणमा छत्रकोट गाउँपालिका वार्ड नं. ५ खज्र्याङ्गमा करिब ६० रोपनीमा आधुनिक प्रविधिको प्रयोग गरी टमाटर खेती शुभारम्भ गरिएको बताए ।
‘दरबार गाउँपालिका वार्ड नं ०३ पुर्खेमा करिब १५० रोपनी तथा मुसिकोट नगरपालिका वार्ड नं ५ आँपचौरमा करिब ३०० रोपनी जग्गा भाडामा लिएर एकीकृत कृषि फर्म सञ्चालनमा ल्याएका छौ ।’ प्रबन्ध निर्देशक न्यौपानेले भने, ‘उक्त ३ स्थानमा जग्गा व्यवस्थापन, सिँचाई प्रणालीको स्थापना गर्न करिब १ करोड ५० हजार पुँजीगत लागत लाग्ने अनुमान गरिएको छ ।’
नेपालका पहाडी तथा हिमाली भूभागमा कृषि उत्पादनमा सम्भावना तथा त्यसको खोजी, पहाडमा प्राकृतिक रुपमा उत्पादन भएका कृषि उपजको उत्पादकत्व वृद्धि, बजारीकरण गर्दै ग्रामीण अर्थतन्त्रलाई सशक्त बनाउने उद्देश्यसहित ९ वर्ष अघि पैचो पसल स्थापना भएको थियो ।
बढ्दो बसाईसराई कम गर्न, कृषिको सम्भावनाको खोजी, प्रविधिको हस्तान्तरण, न्यून सञ्चालन लागत तथा स्थानीय रोजगारीको सृजना यस नमुना उत्पादन केन्द्रको मुख्य उद्देश्य रहेको प्रबन्ध निर्देशक न्यौपानेले बताए ।
तोयनारायण ज्ञवालीको सभापतित्वमा भएको सो कार्यक्रमको संचालन केशवराज न्यौपानेले गरेका थिए भने सहभागीहरुलाई धातानन्द भण्डारीले स्वागत गरेका थिए ।
पैचोले गुल्मी पाल्पा लगायतका पहाडी उच्चपहाडी जिल्लाका किसानले उत्पादन गरेका कृषि उपजलाई खरिद गर्दै रिडीमा रहेको प्रशोधन केन्द्रमा प्रशोधन गर्दै बजारीकरणको काम गर्छ । प्रशोधन केन्द्रमा केचअप, सस, जाम, अचार, चुक लगायतका वस्तु उत्पादन एवं प्रशोधन गर्ने गरिएको छ । पैचोद्वारा उत्पादित खाद्य सामाग्रीहरु नेपालभर विक्री हुन्छ । यस्तै अमेरिका, जापान, अष्ट्रेलिया, यूएई, कतार लगायतका देशमा निर्यात हुँदै आएको छ ।
पैचोले गुल्मी, अर्घाखाँची, पाल्पामा कृषि उपजको संकलन तथा बजारीकरणका गर्न १३ वटा आफ्नै शाखा तथा १२ वटा फ्रेन्चाईज र रिडीमा अत्याधुनिक प्रशोधन केन्द्र संचालन रहेका छन् । ४८ जना शेयर सदस्य रहेको पैचोले तीनसय जनालाई प्रत्यक्ष रोजगारी तथा हजारौंलाई अप्रत्यक्ष रोजगारी दिइरहेको छ । पैचोले २५ हजार कृषकसँग काम गरिरहेको छ । ‘हालसम्म ५० करोडको लगानी गरिसकेको र अब थप लगानी विस्तार गर्दै आईपीओमा जाने योजनामा रहेका छौं’, न्यौपानेले बताए ।
प्रतिक्रिया