नेपालगन्ज । बाँकेमा ज्यान मार्ने कसुरमा संलग्न एकजनालाई पक्राउ गर्न प्रहरीले गोली चलाएको छ । गोली हानेर ज्यान मार्ने उद्योग कसुरमा संलग्न एक जनालाई पक्राउ गर्न प्रहरीले गोली चलाएको हो ।
प्रहरीले चलाएको गोली लागेर बैजनाथ गाउँपालिकाका ३१ वर्षीय आकाश राना घाइते भएका छन् । प्रहरीको खोजी सुचीमा रहेका आकाशलाई पक्राउ गर्न खोज्दा भागेपछि गोली चलाएर नियन्त्रणमा लिइएको बाँकेका प्रहरी प्रमुख प्रहरी उपरीक्षक सुवासचन्द्र बोहराले बताए ।
गत कार्तिक ३० गते बिहान कोहलपुर स्थित चप्परगौडीमा स्थानीय मीन बहादुर बिकलाई आकाश राना सहितका युवाहरूले धारिलो हतियार प्रहार गरेर गम्भीर घाइते बनाएको प्रहरीले जनाएको छ । रानाको समूहले खुकुरी प्रहार गर्दा २९ वर्षीय मीनबहादुर गम्भीर घाइते भएका छन् । उनलाई नेपालगन्जमा उपचार सम्भव नभएपछि उपचारको लागी भारतको लखनउमा पठाइएको छ ।
खुकुरी प्रहारमा संलग्नलाई खोज्दै प्रहरी शुक्रवार जानकी गाउँपालिका–४ स्थित खुर्द खजुरामा पुगेको हो । प्रहरीलाई देखेपछि आकाश राना भागेपछि गोली चलाएर नियन्त्रणमा लिइएको एसपी बोहराले जानकारी दिए । रानाको दायाँ खुट्टामा गोली लागेको छ ।
कार्तिक २८ मा कोहलपुर नगरपालिका–११ मा आकाश रानाले करणी प्रयास गरेको समेत प्रहरीको आरोप छ । उनी लागु औषध मुद्दामा ५ वर्ष जेल बसेर निस्केका हुन् । २०७४ देखी ०७९ सम्म राना नेपालगन्ज कारागारमा थुनामा बसेका थिए ।
नोट : समाचार शिर्सकमा आकाश राना हुनुपर्नेमा अन्यथा भएकोमा सच्याइएको छ ।
प्रतिक्रिया