काठमाडौं । आफुले भनेअनुसार सुन तस्करी छानबिन आयोग बनाउन सरकार तयार नभएको भन्दै रिसाएको प्रमुख प्रतिपक्षी नेकपा एमालेले भोलि बस्ने संसद अवरुद्ध गर्नसक्ने चेतावनी दिएको छ ।
सुन तस्करी प्रकरणमा उच्चस्तरीय छानबिन आयोग बनाउन सरकारले आनाकानी गरेको आरोप लगाउँदै एमालेले भोलिको संसदमा हिसाबकिताब गर्ने चेतावनी दिएको हो । प्रत्यक्ष रुपमा संसद अवरुद्ध गर्ने नभनेपनि एमाले सचेतक महेश बर्तौलाले संसदको कामकारवाही अवरोध गर्ने अप्रत्यक्ष चेतावनी दिएका छन् ।
बर्तौलाले सामाजिक सञ्जालमा लेखेका छन्, ‘भोलि असोज १४ गते प्रतिनिधिसभाको बैठक बस्दै छ तर सरकार संसदको बैठकलाई द्वन्द्व र मुडभेडतर्फ धकेल्न चाहन्छ, मुलुकको समग्र राजनीतिलाई अबिस्वास, धोकाधडी र आपसी अन्तरबिरोधको पथमा लैजाने चेष्टा गर्दैछ ।’
उनले भोलीको सम्भावित घटनाबारे संकेत गर्दै भनेका छन, ‘सुन तस्करीको सम्बन्धमा उच्चस्तरीय छानबिन तथा अनुसन्धानको लागी उच्चस्तरीय जाँचबुझ आयोग बनाउने सहमति भयो । त्यो सहमतिलाई संसदको बैठकले अनुमोदन पनि गर्यो तर त्यसलाई कार्यान्वयन गर्न सरकार तयार भएन, बरु उल्टै अनेकौं बहानबाजी गर्दै प्रमुख प्रतिपक्षी माथी मिथ्या भ्रम छर्न दिउसै रात पार्ने प्रपंच चलिरह्यो।’
‘असोज ५ पछि धेरै दिनहरू बितिसक्यो तर आयोग बनेन, सहमति प्रति सरकारले पुरै धोका दियो,ु उनले सामाजिक सञ्जालबाट भनेका छन, ुसरकारले दिएको धोकाको सावाँ र ब्याज सहितको समग्र हिसाबकिताब त भोलि बस्ने संसदको बैठकमा राम्रैसँग हुने नै छ ।’
प्रतिक्रिया