बुटवल । ईस्लाम धर्मका प्रवर्तक पैगम्बर हजरत मोहम्मद सल्लल्लाहु अलैही वसल्लमको जन्मदिन धुमधामकासाथ मनाईएको छ । हजरत मोहम्मदको १४९८ औ जन्मोत्सवका अवसरमा आज बिभिन्न स्थानमा बाजागाजा सहित जुलुस प्रदर्शन गरिएको छ ।
ईस्लामिक क्यालेण्डर हिजरी सम्वतको तेस्रो महिना रविउलअव्वलको अरबी १ तारिखदेखि १२ तारिखसम्म टोल गल्ली सजावट गर्ने र आज १२ तारिखको दिन मोहम्मदी जुलुस निकाल्ने मुस्लिम समुदायको प्रचलन रहेको छ ।
नेपालगन्जमा ईस्लाम धर्मावलम्बीहरुले विभिन्न स्थानबाट नेपालगन्जमा जम्मा भएर बिहानैदेखि बाजागाजा र झण्डासहित नगरको परिक्रमा गरेका छन् । प्रदर्शनमा सहभागी इस्लाम समर्थकहरुले नेपालगन्जका गल्ली र सडकहरु सजाउनुका साथै सडकमा गुड्ने सवारी साधनमा समेत मदीना नामको झण्डा फहराएका छन् । नेपालगन्जका मुस्लिम समुदायले आ–आफ्नो घरमा मदिनाको फोटो र सरकारकी आमद मरहबा लेखिएको झण्डा लगाएका छन् ।
बिहानैदेखि शुरु भएको जुलुस दिउसो २ बजे सम्पन्न गरिएको नेपालगन्जका मुस्लिम अगुवा मेराज अहमद (हिमालय)ले बताए ।
मुस्लिम अगुवा हिमालयका अनुसार यो जुलुस जामामस्जिददेखि घोसीटोल, फुल्टेक्रा, आँखा अस्पताल, डिएसपीरोड, एमपी स्कुल, रानी तलाउ, एकलैनी, त्रिभुवनचोक, वीपीचोक धम्बोजी हुँदै न्युरोडपछि गौसीया मस्जिदमा गएर समापन गरिएको थियो । मोहम्मद डेमा सहभागी हुन लुम्बिनी प्रदेश सरकारका मुख्यमन्त्री डिल्लीबहादुर चौधरी नेपालगन्ज पुगेका छन् । मुख्यमन्त्री चौधरीसहित नेपालगन्ज उपमहानगरका मेयर प्रशान्त बिष्ट, पूर्व मन्त्री तथा जसपा नेता मोहम्मद इस्तियाक राई मोहम्मद डेको जुलुसमा हिँडेका थिए ।
गौसीया मस्जिद, जामा मस्जिद लगायत सबै मस्जिदहरुमा मिलाद फातिहा गराउने र घर–घरमा मिठो खाने कुराहरुमा फातिहा दिईएको छ ।
यता बुटवलमा पनि ईस्लाम समर्थकहरुले मोहम्मद डे धुमधामका साथ मनाएका छन् । उनीहरुले बिहानै देखि आआफ्नो घर टोल छिमेकको सरसफाई गर्दै जुलुस प्रदर्शन गरेका छन् । पारी बुटवल स्थित जामा मस्जिदबाट निस्केको बाजागाजा र झाँकी सहितको जुलुस नेपालगन्जरोड, अस्पताल चौक, ट्राफिक चोक, राममन्दिरलाईन हुँदै जामा मस्जिद पुगेर समापन भएको थियो । जामा मस्जिद संचालक समितिले यस वर्ष देखि झण्डै एकसाताको कार्यक्रम गरि मोहम्मद जन्मोत्सव मनाउन थालेको छ ।
मदरसा स्तरिय हाजिरिजवाफ, रक्तदान, धार्मिक प्रवचन र ¥याली सहितको कार्यक्रम गरिएको रजा-ए-मुस्तफा जामा मस्जिद समितिका महासचिव अफुर मियाँले जानकारी दिए ।
प्रतिक्रिया