खजुरा । संघीय सरकारबाट संचालनमा रहेको खजुरा स्थित सुशिल कोईराला प्रखर क्यान्सर अस्पताललाई दरबन्दी नदिएपनि यस वर्ष संघीय बजेट भने सरकारले दोब्बर बनाएको छ । बिगत ८ वर्षदेखि काज, करार, ज्यालादारीको भरमा संचालन भइरहेको क्यान्सर अस्पताललाई यस वर्ष अघिल्लो वर्षको तुलुनामा बजेट दोब्बर बनाएको हो ।
धार्मिक उद्देश्य सहित स्थानीय नागरिकहरुले महायज्ञ गरेर स्थापना गरेको अस्पताललाई २०७२ सालमा नेपाल सरकारलाई हस्तान्तरण गरिएको थियो । त्यस यता संघीय सरकारबाट बिना दरबन्दी अस्पताल संचालन हुँदै आएको छ । सरकारले क्यान्सर अस्पताल सञ्चालनका लागि चालु आर्थिक बर्ष २०८०र८१ मा पुँजीगत र चालु खर्चतर्फ दोब्बर बढी विनियोजन भएको छ ।
चालु आवमा पुँजीगततर्फ १५ करोड र चालुतर्फ १० करोड गरी २५ करोड रुपैयाँ बजेट विनियोजन भएको सुशील कोइराला प्रखर क्यान्सर अस्पताल विकास समितिका अध्यक्ष टेकेन्द्र मल्लले जानकारी दिए ।
उनले लगातार दरबन्दी स्वीकृतिकालागि माग गरिएपनि दरबन्दी भने स्वीकृत नभएको बताए । सरकारले विनियोजन गरेको बजेट बृद्दीले दरबन्दी पनि छिट्टै स्वीकृत हुने आशा पलाएको उनले बताए ।
मल्लका अनुसार स्वास्थ्य तथा जनसङ्ख्या मन्त्रालयले अघिल्ला आर्थिक वर्षहरुमा पुँजीगततर्फ ६ करोड र चालु खर्चतर्फ चार करोड गरी १० करोड रुपैयाँ मात्रै बजेट विनियोजन गर्दै आएकोमा यस बर्ष उल्लेख्य मात्रामा बजेट विनियोजन गरेको हो ।
बजेट थप भएपछि क्यान्सरको उपचारका लागि नयाँ उपकरण सञ्चालन तथा अन्य सेवा सञ्चालनका लागि सहयोग पुग्ने अस्पताल विकास समितिले जनाएको छ ।
अस्पतालमा शुक्रबारदेखि सम्पूर्ण साधारण शैयाहरु निःशुल्क गरिएको छ । साथै अस्पतालमा भर्ना भएका अति विपन्न बिरामीलाई निःशुल्क खानाको पनि व्यवस्था भएको अस्पतालका निर्देशक डा. निरज भट्टराईले जानकारी दिए ।
अस्पतालमा जडानको क्रममा रहेको लिन्याक मेशिन सञ्चालनमा आएसँगै क्यान्सरका सबै उपचार सेवा खजुराबाटै दिन सकिने उनले बताए ।
क्यान्सर अस्पताल निर्माणको प्रारम्भिक शुरुवात प्रखर परोपकार मिसनमार्फत खजुराबासीले गरेका थिए । सन्त दीनदयाल जीको संकल्पमा खजुराका स्थानीय बासिन्दाले धार्मिक महायज्ञ मार्फत मुठीदान सङ्कलन गरी निर्माण शुरु गरेको सुशील कोइराला प्रखर क्यान्सर अस्पताल २०७२ सालमा सरकारलाई हस्तान्तरण गरिएको थियो ।
प्रतिक्रिया