काठमाडौं । सिन्धुपाल्चोकको तातोपानी नाका लामो समयपछि सर्वसाधारणका लागि पुनः खुला भएको छ ।
आठ वर्षपछि आजबाट नेपाल–चीन मितेरी पुलरहेको तातोपानी नाका सर्वसाधारणको लागि खुला भएको हो ।
सिन्धुपाल्चोकको भोटेकोशी गाउँपालिकाका ३० जना स्थानीय सर्वसाधारणलाई चिनियाँ भूमिमा प्रवेश गराएर तातोपानी नाकालाई पुनः सुचारु गरिएको हो ।
सांसद माधव सापकोटासहितको टोलीलाई चिनियाँहरुले भव्य स्वागत गरेका थिए ।
नाका खुलाउन नेतृत्वदायी भूमिका खेलेका सिन्धुपाल्चोक क्षेत्र नं १ बाट प्रत्यक्ष निर्वाचित प्रतिनिधिसभा सदस्य माधव सापकोटा बिहानै तातोपानी नाका पुगेका थिए। तातोपानी क्षेत्रका जनप्रतिनिधि, भन्सार र अध्यागमन कार्यालयका अधिकारीसहित नाकामा पुगेका उनले अब नाका पूर्ण सञ्चालनमा आएको बताए ।
प्रधानमन्त्री पुष्पकमल दाहाल प्रचण्डको चीन भ्रमण अघि तातोपानी नाका सर्वसाधारणका लागि खुला भएको छ । गत मंगलबार तिब्बतको ल्हासामा चिनियाँ अधिकारी र नेपाली अधिकारीबीच भएको बैठकले सर्वसाधारणका लागि नाका खुला गर्ने निर्णय गरेको थियो । पहिलो चरण सिन्धुपाल्चोकको नागरिकता भएकाहरु मात्र तातोपानीबाट चिनियाँ क्षेत्रमा जान पाउनेछन् । उनीहरुले एक वर्ष अवधिको पास पाउनेछन् । त्यसपछि क्रमशः अन्य जिल्लाबासीलाई पनि परिचयपत्रका आधारमा पास दिइने बताइएको छ ।
२०७२ सालको विनाशकारी भूकम्पपछि तातोपानी नाका पुरै बन्दभएको थिो । तीन महिनाअघि तातोपानी नाकाबाट मालवाहक सवारीको आवतजावत खुला गरिएको थियो।
केही समयअघि चिनियाँ अधिकारीले आजैदेखि मानिस ओहोरदोहोरका लागि नाका सञ्चालन गर्ने तयार रहेको खबर पठाएका थिए । त्यसपछि चिनियाँ अधिकारीबीच भएको छलफलले स्थानीय आवतजावत गर्न पाउने निर्णय गरेको प्रमुख जिल्ला अधिकारी रमेश न्यौपानेले जानकारी दिए ।
प्रतिक्रिया