दशौं महाधिवेशन गर्ने निर्णय गर्दै सकियो एकीकृत समाजवादीको केन्द्रीय कमिटी बैठक

काठमाडौं । दशौं महाधिवेशन गर्ने निर्णय गर्दै नेकपा एकीकृत समाजवादीको केन्द्रीय कमिटी बैठक सकिएको छ। ललितपुरको बालकुमारीको पार्टी कार्यालयमा मंगलबारदेखि जारी बैठकले गठन भएको २ वर्षको अवधिमा दशौं महाधिवेशनको निर्णय गर्दै आज सकिएको हो।

बैठकले माघ १४ देखि १८ गते दशौं महाधिवेशन गर्ने निर्णय गरेको छ। यस्तै बैठकले अध्यक्ष माधव कुमार नेपालले बैठकमा पेश गरेका राजनीतिक र सांगठनिक प्रतिवेदन सुझावसहित सर्वसम्मतिले पारित गरेको छ ।

बैठक सकिएपछि महासचिव घनश्याम भुसालले जारी गरेको पूर्णपाठमा बैठकले एमसीसी सम्झौता ठूलो विवादका बीच नेपालको हित रक्षाको प्रत्याभूतिका लागि संसदबाट व्याख्यात्मक घोषणा गरिएको तथ्य स्मरण गराउँदै संसदले व्याख्यात्मक घोषणालाई सम्झौताका अंग बनाएर समझौता कार्यान्वयनको अनुगमन गर्न संसदीय समिति बनाउन सरकारसँग जोडदार माग गरिएको छ।

बैठकले २०८३ सालमा हुने स्थानीयतह निर्वाचनमा बहुमत आउने गरि संगठन परिचालन गर्ने तथा आगामी मंसिरसम्ममा कमिटी नभएका सबै स्थानीय तह सम्म कमिटी गठन गरि सक्ने पनि निर्णय गरेको छ ।