बुटवलको देविनगरबाट मोटरसाइकल चोरी गर्ने युवा पक्राउ

बुटवल । बुटवल उपमहानगरपालिका-११ देविनगरको रङ्गशाला नजिकैंबाट रातको समयमा मोटरसाइकल चोरी गर्ने एक युवा पक्राउ परेका छन् । पक्राउ पर्नेमा कपिलवस्तु नगरपालिका-६ गोबरीका लोक बहादुर विक रहेका छन् ।

देविनगर रङ्गशाला नजिकै पार्किङ गरेर राखिएको स्थानीय भिमबहादुर खासुको लु ३५ प १६२८ नम्बरको मोटरसाइकल आइतबार राती करिब ८ बजेको समयमा चोरी भएको थियो ।

चोरी भएको निवेदनपछि मोटरसाइकल खोजतलास गर्ने क्रममा सोमबार जिल्ला प्रहरी कार्यालय कपिलबस्तुले आरोपितलाई मोटरसाइकलसहित फेला पारेको थियो ।

पक्राउ परेका विकलाई चोरी सम्बन्धि कसूरमा रुपन्देही जिल्ला अदालतबाट म्यादथप लिई थप अनुसन्धान भई रहेको ईलाका प्रहरी कार्यालय बुटवलले जनाएको छ ।