नुनका लागि जुम्लामा ढुंगामुढा भएपछि नेपालगन्जबाट पठाइयो तीन सय २० क्विन्टल नुन

नेपालगन्ज । कर्णाली प्रदेशको जुम्लामा नुनका लागि स्थानीयले साल्ट ट्रेडिङको कार्यालयमा ढुँगामुढा गर्नु पर्ने अवस्था आएपछि नेपालगन्जबाट तीन सय २० क्विन्टल नुन पठाइएको छ ।

जुम्लामा नुनको कमी हुन नदिन सोमबार मात्रै तीन सय २० क्विन्टल नुन ढुवानी गरिएको साल्ट ट्रडिङका लुम्बिनी प्रदेश कार्यालय प्रमुख महेश चौधरीले जानकारी दिए ।

कार्यालय प्रमुख चौधरीले दुर्गम क्षेत्रमा सरकारको ढुवानी अनुदानअन्तर्गत प्रत्येक एक वर्ष ३६ देखि ३८ हजार क्विन्टल नुन ढुवानी गरिने बताए । उनले प्रत्येक नयाँ आर्थिक वर्षका साउनदेखि नयाँ ‘टेन्डर’का लागि आह्वान गरिने भएकाले उक्त नयाँ टेन्डरका लागि सम्पूर्ण कागजात काठमाडौँ पठाई सकिएको जानकारी दिए ।

साल्ट ट्रेडिङ कर्पोरेसन लिमिटेड प्रदेश कार्यालय नेपालगन्जमा गत आर्थिक वर्षको ०७९÷८० असार मसान्तसम्म दुई हजार सात सय ८६ क्विन्टल नुन मौज्दात रहेको सो कार्यालयले जनाएको छ । प्रदेश कार्यालय प्रमुख चौधरीका अनुसार कर्णाली प्रदेश, पूर्वी रुकुम, पश्चिम रुकुम र रोल्पामा असार मसान्तसम्म छ हजार तीन सय ७८ क्विन्टल नुन मौज्दात छ ।

प्रदेश कार्यालय नेपालगञ्जमा भारतको गुजरातस्थित खाडाघोडाबाट एक ¥याकमा २६ हजार क्विन्टलका दरले वर्षमा नौ ¥याक नुन आयात हुने गर्दछ ।