एनआरएन युकेको विवादले पीडितको नाममा उठेको १५ लाख रकम खातामै अड्कियो

बुटवल । एनआरएन युकेमा उत्पन्न विवादले पीडित परिवारका लागि उठाइएको रकम बैंक खातामै अलपत्र परेको छ । अध्ययनका लागि युके पुगेकी २१ वर्षीया सदीक्षा तामाङ बिरामी भई अस्पतालमै मृत्यु भएपछि उनको अन्त्यष्टीका लागि उठाइएको रकम बैंक खातामा खड्किँदा परिवारले सहयोग प्राप्न गर्न नसकेको हो ।

विभिन्न व्यक्ति तथा संघ संस्थाबाट उठाइएको रकम खाताबाट निकाल्न नपाउँदा सदीक्षाको अन्त्यष्टीका लागि परिवारलाई रकम अभाव भएको छ । दोलाखामा जन्मिएकी सदीक्षा नेपालकै उत्कृष्ट ‘हेन्ड राइटिङ’ प्रतिभा भएकी विद्यार्थी थिइन् । उच्च शिक्षाका लागि ऋण-धन गरेर गत २६ डिसेम्बर २०२२ युके पुगेकी उनी अचानक बिरामी भएकी थिइन् । उपचारको क्रममा अस्पतालमै मृत्यु भएपछि नेपाल ल्याउने प्रयास गरिए पनि उनमा लागेको भाइरस अन्यलाई समेत सर्न सक्ने भन्दै अस्पतालले अनुमती दिएन । अनुमती नपाउँदा युके मै अन्त्यष्टी गर्न रकम अभाव भएपछि सहयोगका लागि आह्वान गरिएको थियो ।

एनआरएन यूकेका तत्कालिन उपाध्यक्ष सुनिलबाबु खड्काले गलत नियत राखेर संकलन गरिएको रकम निकाल्न नमिल्ने गरि बैंकमा परिपत्र गरेपछि समस्या सिर्जना भएको हो । एनआरएनए यूकेका अध्यक्ष प्रेम गाहामगरका अनुसार सुनिल बाबुलाई संस्थताको हित बिपरित काम गरेको भन्दै पदमाबाट निलम्बन गरिएको थियो । आफू निलम्बनमा परेपछि सदीक्षाको अन्त्यष्टीका लागि उठेको सहयोग रकम बैंकबाट निकासा गर्न अबरोध सिर्जना गरेका हुन् । सहयोग रकम नपाएपछि सदीक्षाको अन्त्यष्टी गर्न रकम अभावले परिवार अन्यौलमा परेको छ ।

सदीक्षाको मृत्यु भएको गत १० मे देखि अभियान शुरु गरिएपछि स्वतस्फूर्त रुपमा १७८ व्यक्ति र ८ वटा संस्थाले संकलन गरेको करिब १५ लाख रुपैयां संकलन भएको छ । वर्खास्त गरिएका एनआरएनए यूके उपाध्यक्ष सुनिलबाबु खड्काले संकलित चन्दा रकम आफूले हात पार्ने प्रयास गरेको आरोप लागेको छ । नक्कली भुटानी शरणार्थी कुल आचार्य र नारायण कंडेलको योजनामा सुनिलबाबुले सदीक्षाको नाममा संकलित चन्दा खान खोजेको एनआरएनका एक पक्षले आरोप लगाएका छन् ।

अध्यक्ष गाहा मगरका अनुसार संकलित रकम सदीक्षाका बुबालाई बेलायतमै हस्तान्तरण गर्ने योजना रहेको थियो । आउंँदो ७ जुलाईमा अल्डरसट पार्क क्रिमेटोरिएममा हुने फ्यूनरल सर्भिसमा सदीक्षाका बाबु अन्त्यष्टीका लागि यूके जाँदै छन् ।

सदस्यताका नाममा प्रतिव्यक्ति १० पाउण्डका दरले उठाइरहेको रकम तथा पीडितका लागि उठाइएको रकम समेत सुनिलबाबुको समूहले कुम्ल्याउन खोजेको आरोप छ । ‘पोहोर एनआरएनए यूकेको ४० हजार पाउण्ड खायो । अहिले मरेको मान्छेको ९ हजार पाउण्ड पनि खान र्याल चुहाउंदैछ’, एक अभियन्ताले आक्रोश पोखे, ‘सुनिललाई दिवंगतको आत्माले पक्कै पिरोल्नेछ ।’