१९८ जना नेपाली विद्यार्थीलाई ‘एम्बेसेडर अफ पाकिस्तान’ छात्रवृत्ति प्रदान

काठमाडौं । पाकिस्तानी राजदूतावासले १९८ नेपाली विद्यार्थीलाई छात्रवृत्ति प्रदान गरेको छ ।

आज दूतावासले काठमाडौंमा ११औँ वार्षिक छात्रवृत्ति पुरस्कार समारोहको आयोजना गर्दै नेपाली विद्यार्थीहरुलाई छात्रवृत्ति प्रदान गरेको हो । राष्ट्रियसभाका अध्यक्ष गणेशप्रसाद तिमिल्सिनाले १९८ नेपाली विद्यार्थीलाई “एम्बेसेडर अफ पाकिस्तान छात्रवृत्ति” प्रदान गरेका छन् ।

दूतावासले देशभरका सरकारी विद्यालयबाट छानिएका उत्तम विद्यार्थीहरुलाई छात्रवृत्ति प्रदान गर्दैआएको छ । यस वर्ष ४३ विद्यालयका १९८ विद्यार्थीलाई नगद र ल्यापटप प्रदान गरिएको छ ।

त्यसअवसरमा बोल्दै अध्यक्ष तिमिल्सिनाले पाकिस्तानको निरन्तर सहयोग प्राप्त भैरहेकोमा प्रशंसा गरे । उनले शिक्षाको क्षेत्रमार्फत नेपाल र पाकिस्तानका जनताबीचको जनता–जनताको सम्पर्कलाई अगाडि बढिरहेको बताउँदै दुई देशबीचको घनिष्ट मैत्रिपूर्ण सम्बध अझ विस्तार हुने विश्वास व्यक्त गरे ।

कार्यक्रममा पाकिस्तानका राजदूत अबरार एच हाश्मीले छात्रवृत्ति कार्यक्रमलाई थप विस्तार गर्ने प्रतिवद्धता जनाए । उनले पाकिस्तान–नेपाल द्विपक्षीय सम्बन्धलाई थप मजबुत बनाउने आफ्नो संकल्प र इच्छा पनि व्यक्त गरे ।

सन् २०१३ मा सुरु भएको एम्बेसडर अफ पाकिस्तान छात्रवृत्ति कार्यक्रम विगतका वर्षहरूमा बढ्दै गएको छ ।