काठमाडौं । गुजरात टाइटन्सविरुद्ध १५ रनको जित निकाल्दै चेन्नई सुपर किङ्स भारतमा जारी इन्डियन प्रिमियर लिग (आईपीएल) को फाइनलमा प्रवेश गरेको छ । चेन्नाई १० औं पटक आईपीएलको फाइनलमा प्रवेश गरेको हो ।
मंगलबार एमए चिदम्बरम रंगशालामा चेन्नाईले प्रस्तुत गरेको १७३ रनको लक्ष्य पछ्याउने क्रममा साविक विजेता गुजरातले निर्धारित २० ओभरमा सबै विकेट गुमाएर १५७ रनमात्र जोड्न सक्यो । त्यसअघि टस हारेर ब्याटिङमा आएको चेन्नाईले निर्धारित २० ओभरमा सात विकेट गुमाएर १७२ रनको योगफल खडा गरेको थियो ।
चेन्नाईका रितुराज गाइकवाडले ६० रन बनाए । गाइकवाडले ४४ बलमा सात चौका र एक छ्क्का प्रहार गरे । डेवोन कोन्वेले ४० र मोइन अलिले २२ रन थपे । अजिन्क्या रहाने र अम्बती रायडुले समान १७ रन जोडे ।
गुजरातका मोहम्मद सामी र मोहित शर्माले समान दुई विकेट लिए । नूर अहमेद, राशिद खान र दर्शन नालखन्डेले एक-एक विकेट लिए ।
१७३ रनको लक्ष्यसहित मैदान उत्रिएको गुजरातका सुभमन गिलले ४२ रन बनाए । राशिद खानले ३०, दसुन सनाकाले १७, विजय शंकरले १४ र रिद्दिमान साहले १२ रन जोडे ।
चेन्नाईका रविन्द्र जडेजा, दीपक चहर, महिष थिक्षणा र मथिसा पथिरानाले समान दुई विकेट लिए । तुसार देशपान्डेले एक विकेट हात पारे ।
जितसँगै फाइनलमा स्थान बनाएको चेन्नाईले अब उपाधिका लागि दोस्रो क्वालिफायरको विजेतासँग खेल्नेछ । गुजरातले भने अब फाइनल प्रवेशका लागि इलिमिनेटर विजेतासँग खेल्नेछ ।
प्रतिक्रिया